Вакилони палатаи поёнии Парлумони Тоҷикистон тарҳи ислоҳ ба қонуни оиларо омода кардаанд, ки нисбат ба шахсони далла, соҳибони фоҳишахонаҳо ва афроди гунаҳкор ба бадрафторӣ бо ноболиғон ҷазои сахттар пешбинӣ мекунад.
Бино ба иттилои Дафтари матбуоти Маҷлиси Намояндагон “шахсоне, ки барои содир кардани ҷиноятҳо ба муқобили озодии ҷинсӣ ва дахлнопазирии ҷинсии кӯдакони то 16-сола маҳкум шудаанд ва шахсоне, ки барои ташкил ё нигаҳдошти фоҳишахонаҳо, инчунин даллагӣ машғул мебошанд, аз ҳуқуқи падарӣ ва модарӣ маҳрум мегарданд.”
Ин тағйирот дар ҳолест, ки ҳафтаи қабл гурӯҳе аз намояндагони ҷомеаи шаҳрвандии Тоҷикистон дар маҷмӯъ бо 54 имзо аз Президенти Тоҷикистон Эмомалӣ Раҳмон ва раҳбарони ду палатаи Порлумон талаб кардаанд, ҷазоро барои бадахлоқӣ нисбат ба ноболиғон сахттар кунанд.
Ин бори дуввум аст, ки дар Тоҷикистон нисбат ба фоҳишаҳо қонун тағйир меёбад, пеш аз ин дар соли 2018, Порлумони Тоҷикистон ҷазо барои ташкили фоҳишахонаҳоро сахттар карда буд.
Бино ба тағйироте, ки ба Кодекси ҷиноии Тоҷикистон ворид шуд, касе бори дуввум бо иттиҳоми ташкили фоҳишахона дастгир мешавад, аз панҷ то ҳашт сол аз озодӣ маҳрум хоҳад шуд.
