Пулиси шаҳри Самараи Федератсияи Русия иқомаи доимии як шаҳрванди Тоҷикистонро бекор кард.
Бино ба иттилои расонаҳои русӣ, сабаби бекоркунии ҳуҷҷати ин муҳоҷири тоҷик надоштани имкониятҳои молиявии кофӣ барои таъмини худ ва аъзои оилааш бидуни ёрии давлатӣ арзёбӣ шудааст.
Тавре Додгоҳи вилояти Самара хабар медиҳад, иқомаи доимӣ ба ӯ дар соли 2021 аз ҷониби Раёсати ВКД Русия дар вилояти Самара дода шуда буд, аммо дар соли 2024 он бо қарори ҳамин ниҳод бекор карда шуд.
Пас аз ин муҳоҷири тоҷик аз болои қарори РВКД-и Русия дар вилояти Самара ба Додгоҳи ноҳиявии Октябр шикоят бурдааст. Вале дар моҳи майи соли ҷорӣ додгоҳ низ бо ишора ба надоштани даромад, набудани ҷойи кори расмӣ, моликият дар қаламрави Федератсияи Русия, маълумот дар бораи пардохти андоз ва далелҳои пардохти алимент барои фарзанд ба таври муқарраргардидаи қонун, аз қарори ВКД ҷонибдорӣ кардааст.
Дар қарори додгоҳ ҳамчунин зикр гардида ки бекор кардани иҷозаи иқомат ҳуқуқи шаҳрванди Тоҷикистонро барои зист дар Русия поймол намекунад, зеро ӯ имкони будубош дар асоси дигар шаклҳои қонунӣ ва кору зиндагӣ дар қаламрави ин кишварро дорад.
Номи ин зодаи Тоҷикистон ва назари ӯ дар ин бора дастраси расонаҳо нест. Инчунин тақдирии баъдии ӯ рушан нест.
Бояд гуфт, чандест дар Русия фазои муҳоҷирбадбинӣ ба авҷи худ расида, мақомоти ин кишвар бо ҳар баҳона дар кӯчаву хобгоҳҳо ва ҳатто қаҳвахонаву бозорҳо “рейд” гузаронда, нисбати муҳоҷирон бадрафторӣ карда истодаанд ва ҳуҷҷати зодагони кишварҳои Осиёи Марказӣ, бахусус зодагони Тоҷикистонро барои нарафтан ба ҷанги зидди Украина бекор мекунад.
Инчунин дар ин муддат чандин қонунҳои наве дар Думаи давлатӣ пешниҳоду қабул гардид, ки шароити бе ин ҳам бади корӣ барои муҳоҷиронро мушкилтар мекунад.
