Хона блог

Созмонҳо аз Олмон хостанд, ки Саидтаиб Саидмамудовро ихроҷ накунад

Аз ҷониби
AZDA-TV
-
0

Ҳаракати сиёсии “Гурӯҳи 24” аз мақомоти Олмон даъват кардааст, ки аз ихроҷи Саидтаиб Саидмамудов, ҷонибдори ин ҳаракат ва намояндаи ҷомеаи помириҳо ба Тоҷикистон пешгирӣ кунанд.

Дар номаи ҳаракат, ки 3-уми ноябр ба Вазорати корҳои хориҷӣ ва Идораи федералии муҳоҷират ва гурезаҳои Олмон фиристода шудаааст, таъкид мешавад, ки ба далели фаъолияти сиёсӣ ва иштирок дар эътирозҳои зидди ҳукумати Эмомалӣ Раҳмон бозгардондани Саидтаиб Саидмамудов ба Ватан ҷони ӯро дар хатар мегузорад ва мариди боздошт, шиканҷа ва зиндон қарор хоҳад гирифт.

“Гурӯҳи 24” аз мақомоти Олмон хостааст, ки бо дарназардошти уҳдадориҳои байналмилалии ҳифзи ҳуқуқи инсон, аз ихроҷи Саидмамудов пешгирӣ кунанд ва масъалаи ҳимояи ӯро ҳамаҷониба баррасӣ намоянд.

Ёдовар мешавем, ки Саидтаиб Саидмамудов рӯзи 19-уми октябр дар Олмон боздошт шуда, то ҳол дар боздоштгоҳе дар шаҳри Ҳофи иёлати Бавария қарор дорад ва эҳтимоли ихроҷаш ба Тоҷикистон вуҷуд дорад.

Рӯзи 3-уми ноябр Лайло Нозгул Саидбек, раиси созмони “Freedom for Eurasia”, низ дар шабакаи «Х» дар ишора ба қазияи Саидтаиб Саидмамудов аз хатари ихроҷи ӯ аз Олмон ба Тоҷикистон изҳори нигаронӣ карда буд. Ӯ таъкид кард, ки бозгардондани мухолифони тоҷик ба ватан дар гузашта бо ҳукмҳои тӯлонии зиндон анҷом ёфтааст.

Ҳю Вилямсон, намояндаи созмони “Human Rights Watch”, низ аз ҳукумати Олмон даъват кардааст, ки парвандаи Саидтаиб Саидмамудовро бознигарӣ кунад. Ба гуфтаи ӯ, иштироки Саидмамудов дар эътирозҳои зидди ҳукумати Тоҷикистон метавонад ӯро пас аз бозгашт ба кишвар ба хатари зиндон ва бадрафторӣ рӯбарӯ созад.

Бояд гуфт, Саидмамудов дар эътирозҳои 28 ва 30-юми сентябри соли 2023 дар Берлин, ки дар рӯзҳои сафари Эмомалӣ Раҳмон ба Олмон алайҳи сиёсати мақомоти Тоҷикистон ва нақзи ҳуқуқи инсон дар кишвар баргузор шуда буданд, иштирок кардааст.

Масъалаи эҳтимоли ихроҷи Саидмамудов дар ҳолест, ки мақомоти Олмон дар ҳашт моҳи аввали соли 2026 27 шаҳрванди Тоҷикистонро аз кишвар ихроҷ кардаанд. Ин рақам дар посухи ҳукумати Олмон ба дархости вакилони Ҳизби чап дар Бундестаг оварда шудааст. Мақомот дар бораи шахсияти ихроҷшудагон ва сабабҳои ихроҷи онҳо маълумоти муфассал надодаанд.

Тибқи маълумоти расмӣ, то охири моҳи августи соли 2026 дар Олмон тақрибан 13 ҳазор шаҳрванди Тоҷикистон зиндагӣ мекарданд. Аз ин шумора 1074 нафар вазифадор шудаанд, ки кишварро тарк кунанд ва барои дастикам 152 нафари онҳо хатари ихроҷи маҷбурӣ вуҷуд дорад.

Бояд гуфт чанд фаъоли мухолифи тоҷик пас аз истирдод аз Олмон дар Тоҷикистон боздошт ва зиндонӣ шудаанд. Аз соли 2023 ба ин сӯ Абдуллоҳи Шамсиддин, Билол Қурбоналиев, Дилмурод Эргашев ва Асадулло Бобоев пас аз истирдод ба Тоҷикистон аз 7 то 17 соли зиндон маҳкум шудаанд.

Шикоят аз бетаваҷҷуҳӣ дар бемористон: бемор пас аз чанд соат интизорӣ ба кома рафт

Аз ҷониби
Azda TV 3
-
0

Наворе, ки рӯзноманигор Шаҳлои Гулхоҷа дар саҳифаи худ дар шабакаҳои иҷтимоӣ нашр кардааст, баҳсҳои зиёдеро ба миён овард. Дар навор як шаҳрванд аз муносибати кормандони тиб ва бетаваҷҷуҳӣ ба беморон дар бемористони “Медгородок” шикоят мекунад.

Ба гуфтаи ӯ, модараш, ки гирифтори бемории дил аст, аз соати 12:00 то 16:00 дар бемористон интизори ёрии табибон будааст. Ӯ иддао мекунад, ки дар ин муддат ягон духтур ба бемор расидагӣ накарда, кумаки аввалияи тиббӣ низ расонида нашудааст.

Дар навор гуфта мешавад, ки бемор тақрибан чор соат дар роҳрави бемористон мунтазир мондааст ва баъди ин вазъи саломатии ӯ бадтар шудааст.

Ин чунин гуфта мешавад, бемор ба кома рафтааст

Дар ҳамин ҳол, дар бахши шарҳҳои зери навор корбаре бо номи “muslimbedilov” зоҳиран аз қазия огоҳ аст, ба ҷои бемористон, наздикони беморро гунаҳкор дониста, онҳоро ба беэътиноӣ нисбат ба нигоҳубини бемор муттаҳам кардааст. Ин корбар ҳамчунин наздикони беморро ба иғвоангези мутаҳам кардааст.

То ҳол роҳбарияти бемористони “Медгородок” ё Вазорати тандурустӣ ва ҳифзи иҷтимоии аҳолии Тоҷикистон дар бораи ин ҳодиса ва иддаоҳои зикршуда изҳороти расмӣ нашр накардаанд.

Масъалаи сифати хизматрасонии тиббӣ ва фасоди молӣ дар бемористонҳо солҳост яке аз мавзуъҳои баҳснок дар Тоҷикистон боқӣ мемонад. Сокинон, махсусан дар шаҳру ноҳияҳои дурдаст ва деҳот, аз норасоии мутахассисони соҳибтаҷриба, камбуди таҷҳизот ва мушкилот дар дастрасӣ ба ёрии босифати тиббӣ шикоят мекунанд.

Хадамоти муҳоҷират аз ҷамъоварии пул барои кумакҳо ҳушдор дод

Аз ҷониби
AZDA.TV
-
0

Хадамоти муҳоҷирати Тоҷикистон мегӯяд, бархе афрод ва бунёдҳои қалбакӣ дар шабакаҳои иҷтимоӣ бо нашри аксу наворҳои сохта аз мардум пул ҷамъ мекунанд. Ин ниҳод рӯзи 4-уми ноябр хабар дод, ки кормандонаш дар фурудгоҳи Душанбе мусофиронро аз ин шеваи фиреб огоҳ кардаанд.

Хадамот аз шаҳрвандон хостааст, ки пеш аз фиристодани пул номи расмии созмон, ҳадафи ҷамъоварии маблағ ва ба кӣ тааллуқ доштани суратҳисоби бонкиро бисанҷанд. Ин ниҳод ба хусус аз интиқоли пул ба кортҳое ҳушдор додааст, ки рақамашон дар каналҳои ношиноси Телеграм ё аз номи шахсони бегона дар паёмрасонҳо паҳн мешавад.

Хадамоти муҳоҷират моҳи октябр низ дар ҳамин фурудгоҳ ба шаҳрвандоне, ки барои кор ба Русия мерафтанд, ҳушдори монанд дода буд. Аммо аз эъломияи нав маълум нест, ки оё сабаби такрори ҳушдор шикояти мушаххаси муҳоҷирон будааст ё фақат барои пешгирӣ. Ҳамзамон Хадамоти муҳоҷирати кишвар номи ҳеч бунёд ё саҳифаи қалбакиро наовардааст ва шарҳ ҳам надодааст, ки шахсе, ки дар чунин дом меафтад ва фиреб мехӯрад, барои бозгардонии маблағаш ба куҷо муроҷиат кунад.

Дар Тоҷикистон қаблан низ аз ҷамъоварии пул бо баҳонаи кумак ба ниёзмандон хабар додаанд. Дар гузашта низ Вазорати корҳои дохилии кишвар гузориш дода буд, ки бархе аз сокини Душанбе барои таъсиси саҳифаи қалбакӣ дар шабакаҳои иҷтимоӣ бо баҳонаи ҷамъоварии пул барои кумак ба ниёзмандон дастгир шуда буднд. Ба гуфтаи пулис, шахсони гумонбар аз як тараф аз мардум барои ниёзмандон пул ҷамъ мекарданд ва аз тарафи дигар, аз худи ниёзмандон ҳам барои ворид кардани номашон ба рӯйхати кумакгирандагон маблағ мегирифтанд.

Демократҳо дар интихоботи миёндавраии ИМА пешсаф шуданд

Аз ҷониби
Azda TV 3
-
0

Ҳизби демократи Амрико бо пирӯзии аксарият бар ҷумҳурихоҳони ин кишвар дар ҳарду палатаи Конгресс ғолиб омаданд.

Ба гузориши хабаргузориҳои амрикоӣ, Ҳизби демократ дар интихоботи миёндавраии 3-уми ноябр дар Сенат ва Маҷлиси намояндагони Амрико аксариятро ба даст овард. Расонаҳои амрикоӣ ин натиҷаро шикасти ҷиддии сиёсӣ барои ҳизби президенти ИМА Доналд Трамп арзёбӣ мекунанд.

Ба гузориши “Ал-Ҷазира“, демократҳо дар Маҷлиси намояндагон аз ҳадди 218 курсие, ки барои аксарият дар ин палатаи 435-нафара зарур аст, гузаштанд. Дар Сенат, тибқи ҳисоби субҳи 4-уми ноябри шабакаи Fox News, ҷиноҳи демократҳо аз 100 курсӣ 54 курсӣ ва ҷумҳурихоҳон 44 курсӣ доштанд. Барандагони ду курсии дигар ҳанӯз маълум набуданд.

Яке аз шикастҳои муҳими ҳизби Доналд Трамп дар Техас рақам хӯрд. Ду сол пеш Трамп дар ин иёлат бо бартарии 14 банди дарсадӣ пирӯз шуда буд. Ин бор Ҷеймс Таларико, номзади демократҳо ба Сенат, Кен Пакстонро, ки аз пуштибонии Трамп бархӯрдор буд, шикаст дод. Дар иёлати Канзас низ Адам Ҳэмилтон бар сенатори ҷумҳурихоҳ Роҷер Маршалл пирӯз шуд. Ин нахустин пирӯзии демократҳо дар интихоботи Сенат аз ин иёлат дар қариб як аср аст.

Ба гузориши Reuters, гаронии зиндагӣ ва норозигӣ аз ҷанг бо Эрон аз масъалаҳое буданд, ки ба интихоби раъйдиҳандагон таъсир гузоштанд. Дар назарсанҷии шабакаи NBC тақрибан нисфи пурсидашудагон гуфтаанд, ки ин интихоботро фурсате барои баён кардани норозигии худ аз фаъолияти Трамп медонанд.

Бо оғози кори Конгресси нав дар моҳи январи соли 2027, Трамп ду соли боқимондаи раёсати ҷумҳуриашро бо Конгрессе сипарӣ мекунад, ки ҳар ду палатааш дар дасти мухолифони сиёсии ӯст. Барои тасвиби буҷет ва тарҳҳои қонунӣ Кохи Сафед ба мувофиқа бо демократҳо ниёз хоҳад дошт. Аксарият дар Сенат ба демократҳо имкон медиҳад, ки номзадҳои пешниҳодкардаи президентро ба мақоми вазир ё судяи федералӣ рад кунанд.

Доналд Трамп гуфтааст, ки натиҷаҳои интихоботро қабул мекунад ва омода аст бо демократҳо ҳамкорӣ кунад. Бо вуҷуди ин, ӯ ҳамчунон салоҳиятҳои васеъ дар сиёсати хориҷӣ ва амалиёти низомиро нигоҳ медорад.

Таҳлилгарон мегӯянд, назорати Конгресс ба демократҳо имкон медиҳад, ки фаъолияти маъмурияти Трампро бештар назорат кунанд, аз ҷумла дар масъалаҳои буҷа, ҷанг дар Украина, муносибат бо Русия ва сиёсати Вашингтон нисбат ба Эрон.

Вазорати мудофиа: Беш аз 97 дарсади нақшаи даъвати тирамоҳӣ иҷро шуд

Аз ҷониби
AZDA.TV
-
0

Вазорати мудофиаи Тоҷикистон рӯзи 2-юми ноябр хабар дод, ки дар моҳи аввали даъвати тирамоҳӣ беш аз 97 дарсади нақшаи даъвати сарбозон ба сафи Қувваҳои мусаллаҳи кишвар иҷро шудааст.

Вазорат дар ин иттилоияи худ нагуфтааст, ки имсол чанд нафарро ба хидмати ҳарбӣ даъват карданист ва то поёни октябр чанд нафарро ба сафи артиш фиристодааст.

Ба иттилои вазорат, Вилояти Мухтори Кӯҳистони Бадахшон аз аввалин минтақаҳое буд, ки нақшаро пурра иҷро кард. Шаҳри Душанбе ва вилояти Хатлон низ то поёни октябр аз иҷрои пурраи нақша хабар додаанд. Дар шаҳру ноҳияҳои тобеи ҷумҳурӣ ин нишондиҳанда ба 99,6 дарсад ва дар вилояти Суғд ба наздики 92 дарсад расидааст.

Вазорат қаблан хабар дода буд, ки дар даҳ рӯзи аввали даъват 84 дарсади нақшаи ҷумҳурӣ иҷро шудааст.

Даъвати тирамоҳӣ 1-уми октябр оғоз шуд ва то поёни ноябр идома мекунад. Тибқи фармони президент, мардони аз 18 то 27-солае ба хидмати ҳарбӣ даъват мешаванд, ки барои озод шудан аз хидмат ё ба таъхир андохтани даъват асоси қонунӣ надоранд.

Тоҷикистон 100 миллион доллар аз САСР қарз гирифт

Аз ҷониби
AZDA.TV
-
0

Тоҷикистон бахши аввали қарзи 200-миллиондолларии Сандуқи авруосиёии суботу рушд (САСР)-ро дарёфт кард. Дар ин бора САСР рӯзи 2-юми ноябр дар сомонаи расмияш хабар додааст.

Бино ба иттилоияи Сандуқ, маблағ рӯзи 30-юми октябри соли 2026 ба Тоҷикистон интиқол ёфтааст. Қарз ба муҳлати 20 сол, бо дарсади солонаи 1% ва давраи имтиёзии даҳсола дода мешавад. Он барои пуштибонӣ аз барномаи суботи иқтисодӣ ва ислоҳоти ҳукумату Бонки миллӣ дар солҳои 2025–2027 пешбинӣ шудааст.

Дар иттилоияҳои расмӣ ҳадафи маблағгузорӣ шарҳ дода шудааст, аммо тақсимоти 100 миллион доллари воридшуда аз рӯйи хароҷоти мушаххас оварда нашудааст.

Созишномаи қарзи 200-миллиондолларӣ рӯзи 13-уми август ба имзо расида буд. Ба гузориши “Азия-Плюс”, маблағгузорӣ дар се марҳила — аввал 100 миллион доллар ва сипас ду бор 50 миллиондолларӣ — анҷом мешавад. Дарёфти бахшҳои баъдӣ ба иҷрои тадбирҳои барнома вобаста аст.

Дар шарҳи созишнома гуфта мешавад, ки қарз барои хароҷоти буҷет, аз ҷумла хароҷоти афзалиятноки иҷтимоӣ, равона мешавад. Ин ниҳод зарурати дастгириро ба фишоре низ рабт додааст, ки бозпардохти вомбаргҳои байналмилалии Тоҷикистон ба буҷет меорад.

Аммо дар иттилоияҳои нашршуда аз ҷониби Сандуқ ё ҳукумати Тоҷикистон мушаххас нашудааст, ки аз маблағи воридшуда чӣ қадар ба кадом соҳа ё хароҷоти буҷетӣ ҷудо мешавад. 

Баланд бардоштани шаффофияти сиёсати иқтисодӣ яке аз самтҳои барномаест, ки Сандуқ барои он қарз медиҳад. Барнома дар маҷмуъ 12 тадбирро дар самтҳои суботи иқтисодӣ, сиёсати буҷетӣ, коҳиши хавфҳои молиявӣ ва шаффофият дар бар мегирад. Дар шарҳи созишнома самтҳои умумӣ оварда шудаанд, аммо рӯйхати пурраи ин тадбирҳо ва меъёрҳои санҷиши иҷрои онҳо зикр нашудааст.

Ин ягона маблағгузории хориҷӣ барои ислоҳоти иқтисодии Тоҷикистон нест. Бонки ҷаҳонӣ моҳи августи соли 2025 50 миллион доллар грантро барои рушди рақобат, бахши хусусӣ ва беҳтар кардани фаъолияти бахши давлатӣ тасдиқ карда буд.

Ин бонк дар иттилоияи якуми июли соли 2026 аз тасдиқи 100 миллион доллар гранти дигар хабар дод. Аз ҳадафҳои он ислоҳоти энергетика, ҳавопаймоӣ ва соҳаи рақамикунонӣ, инчунин баланд бардоштани шаффофияти корхонаҳои давлатӣ гуфта шудааст. Барнома нашри маълумоти муфассали маблағгузорӣ ва хароҷоти мактабҳою муассисаҳои кумаки аввалияи тиббиро низ пешбинӣ кардааст.

Ин ду маблағгузории Бонки ҷаҳонӣ кумаки бебозгаштанд, дар ҳоле ки қарзи Сандуқ бояд бо дарсадаш баргардонида шавад. 

Бо вуҷуди ҷой доштани шаффофият дар ҳадафҳои эълоншудаи барномаҳои маблағгузорӣ, вале ҳангоми иҷрои барномаҳо ва тарзи масрафи ин маблағҳо ҳеч гузорише нашр намегардад ва барои ҷомеа дастрас нест. 

Ин ҳам дар ҳолест, ки Тоҷикистон дар шохиси “Баррасии буҷети боз — 2025”-и Созмони “Мушорикати байналмилалии буҷет” (IBP) дар соли гузашта аз 100 хол 47 хол ва аз нигоҳи иштироки ҷомеа дар раванди буҷет бошад 17 хол гирифтааст, ки ин ниҳод аз 61 хол поёнро дар робита ба сатҳи шаффофият дар иттилооти буҷетӣ кофӣ намедонад. 

Агарчи Вазорати молияи Тоҷикистон ҳисоботи қарзи давлатӣ ва баъзе маълумоти давриро нашр мекунад, вале маълумоти хараҷоти воқеии маблағҳои дарёфтшуда ва ё натиҷаи ин маблағгузориҳои ҳангуфт аз ҳеч ниҳоди ҳукуматие барои шаҳрвандон пешкаш намегардад.

Миллионҳо рубл маоши муҳоҷирони тоҷикро баргардонданд

Аз ҷониби
AZDA-TV
-
0

Дар даҳ моҳи соли 2026 ба муҳоҷирони кории Тоҷикистон дар Русия беш аз 32,5 миллион рубл (ҳудуди 405 ҳазор доллар) маоши пардохтнашуда баргардонида шудааст. Дар ин бора намояндагии Вазорати меҳнат, муҳоҷират ва шуғли аҳолии Тоҷикистон дар Русия рӯзи 2-уми ноябр хабар дод.

Ба иттилои намояндагӣ, ин маблағ дар натиҷаи музокирот бо корхонаҳо ва муассисаҳои Русия ба муҳоҷирон баргардонида шуда, ҳамчунин, бо мусоидати ин ниҳод дар соли ҷорӣ беш аз 9 ҳазор шаҳрванди Тоҷикистон дар Русия бо кори доимӣ таъмин шудаанд.

Ин хабар дар ҳолест, ки намояндагии вазорат моҳи август аз афзоиши ҳолатҳои пардохт нашудани маош ба муҳоҷирони тоҷик дар муқоиса бо ҳамин давраи соли 2025 хабар дода буд.

Аз ҷумла, набудани шартномаи хаттии кор, ба кор қабул шудан тавассути миёнаравҳо, фаъолияти ғайрирасмӣ, бахусус дар ширкатҳои фаррошӣ ва сари вақт муроҷиат накардани коргарон барои ҳимояи ҳуқуқашон аз сабабҳои асосии ин мушкилот номбар шуда буданд.

Намояндагии Вазорати меҳнати Тоҷикистон ба шаҳрвандон тавсия додааст, ки ҳангоми ба кор даромадан бо корфармо шартномаи кории хаттӣ банданд ва нусхаи аслии онро нигоҳ доранд. Барои пайдо кардани ҷойи кор ва гирифтани машварати ройгони ҳуқуқӣ низ метавонанд ба намояндагии вазорат дар Русия муроҷиат кунанд.

Бо вуҷуди ин, маблағи 32,5 миллион рубле, ки ба муҳоҷирон баргардонида шудааст, метавонад танҳо як қисми қарзҳои корфармоён дар назди муҳоҷирони кории тоҷик дар Русия бошад. На ҳамаи коргарон медонанд, ки барои ҳимояи ҳуқуқҳои худ ба куҷо муроҷиат кунанд ва баъзеи онҳо низ аз тарси оқибатҳои эҳтимолӣ аз шикоят кардан аз корфармоён худдорӣ мекунанд.

Солҳои пеш дар ҳимояи ҳуқуқи муҳоҷирони тоҷик фаъолони ҷамъиятӣ ва роҳбарони диаспораҳо низ нақши муҳим доштанд. Аз ҷумла, Каромат Шарипов, ки раҳбари ҳаракати умумирусиягии “Муҳоҷирони кории тоҷик” буд, ба ҳамватанон дар ҳалли баҳсҳои корӣ ва мушкилоти дигар кумак мерасонд. Соли 2017 ӯро аз шаҳрвандии Русия маҳрум карда, аз ин кишвар ихроҷ намуданд ва моҳи майи соли 2020 дар Тоҷикистон даргузашт.

Ҳомии дигари шинохтаи ҳуқуқи муҳоҷирон Иззат Амон буд, ки дар Маскав маркази ҳифзи ҳуқуқи “Тоҷикон”-ро роҳбарӣ мекард. Ин марказ ба муҳоҷирон ёрии ҳуқуқӣ мерасонд ва дар ҳалли масъалаҳои марбут ба шуғл ва ҳуҷҷатгузорӣ кумак мекард. Моҳи марти соли 2021 Иззат Амонро аз Русия ба Тоҷикистон ихроҷ карданд ва дар он ҷо боздошт шуд. Моҳи октябри ҳамон сол додгоҳ ӯро бо иттиҳоми қаллобӣ ба нуҳ соли зиндон маҳкум кард. Моҳи июни соли 2022 дар парвандаи дигари марбут ба қаллобӣ ӯ боз ба 6 соли зиндон маҳкум шуд. Наздикон ва ҷонибдорони Иззат Амон ин иттиҳомҳоро беасос хонда, таъқиби ӯро ба фаъолияти ҳуқуқияш рабт медиҳанд.

Баъди хабарҳо дар бораи эҳтимоли ихроҷ аз Гурҷистон, М. Тағоев аз вазъаш хабар дод

Аз ҷониби
Azda TV 3
-
0

Муҳаммад Тағоев, блогер ва мунтақиди ҳукумати Эмомалӣ Раҳмон, дар суҳбат бо “Паём ТВ” вазъи худро пас аз хабарҳо дар бораи эҳтимоли ихроҷаш аз Гурҷистон шарҳ дод.

Тағоев гуфтааст, ки ҳолаташ хуб аст ва сабаби тақрибан ду ҳафта фаъол набуданаш дар шабакаҳои иҷтимоӣ дастрасӣ надоштан ба интернет будааст.

Ба гуфтаи Тағоев, тақрибан 40 рӯз пеш додгоҳ дархости паноҳандагии ӯро рад кардааст. Ӯ ният дорад аз болои ин қарор ба Додгоҳи Аврупоӣ оид ба ҳуқуқи инсон муроҷиат кунад.

Ӯ ҳамчунин гуфтааст, ки мақомоти қудратии кишвари Гурҷистон аз вазъи ӯ огоҳанд ва тамоми маълумоти марбут ба ӯро дар ихтиёр доранд.

Пештар ин расона аз ғайб задани Муҳаммад Тағоев дар Гурҷистон ва нигарониҳо дар бораи эҳтимоли истирдод ё ихроҷи ӯ хабар дода буд. Он вақт гуфта мешуд, ки Тағоев қаблан аз рад шудани дархости паноҳандагӣ ва хатари бозгардонида шуданаш изҳори нигаронӣ кардааст.

Ёдовар мешавем, ки Муҳаммад Тағоев аз мунтақидони ҳукумати Тоҷикистон ба шумор меравад ва дар шабакаҳои иҷтимоӣ фаъол аст. Ӯ моҳи марти соли 2020 дар Алматои Қазоқистон бо дархости мақомоти Тоҷикистон боздошт шуда буд. Баъдан, соли 2022 озод шуд ва ба Гурҷистон паноҳ бурд.

Такер Карлсон: Натанёҳу Трампро барои ҳамлаи ҳастаӣ ба Эрон фишор меорад

Аз ҷониби
AZDA.TV
-
0

Такер Карлсон, рӯзноманигори маъруфи амрикоӣ, ҳушдор додааст, ки эҳтимол дорад Амрико рӯзҳои наздик ба Эрон ҳамлаи ҳастаӣ анҷом диҳад.

Ин рӯзноманигор мегӯяд, дар бораи ин ҳамла Бинёмин Натанёҳу, нахуствазири Исроил ба Доналд Трамп, раисҷумҳури Амрико фишор овардааст ва эҳтимол Трамп то 7-уми ноябр дар ин бора тасмим бигирад.

Аммо ин иддао то ҳол аз ҷониби мақомоти расмии Амрико ё манбаъҳои мустақил тасдиқ нашудааст.

Такер Карлсон ин иддаоро дар навиштаи тӯлоние, ки рӯзи 2-юми ноябр дар саҳифаи шахсиаш дар шабакаи X нашр кард, матраҳ кардааст.

Ба гуфтаи ӯ, ҳадафи эҳтимолии ҳамла кӯҳи Куланг ё маъруф ба (Pickax Mountain) дар маркази Эрон хоҳад буд. Мақомоти иттилоотии Исроил иддао доранд, Теҳрон дар он ҷо ғанисозии уранро аз сар гирифтааст.

Ин рӯзноманигори амрикоӣ навиштааст, ки таъсисоти эҳтимолии ҳастаӣ дар зери тақрибан 90-метрии санги сахт ҷойгир буда, силоҳҳои маъмулии Амрико қодир ба нобуд кардани нақбҳои зеризаминии он нестанд. Ба назари ӯ, аз ин рӯ, ягона роҳи низомӣ барои нобуд кардани чунин таъсисот истифодаи силоҳи ҳастаӣ хоҳад буд.

Карлсон бо истинод ба як манбаи огоҳ, ки номашро ошкор накардааст, менависад: “Бибӣ (лақаби Натанёҳу) ҳар рӯз дар ин бора ба Трамп занг мезанад”.

Ба гуфтаи ӯ, Натанёҳу дар вазъияти душвори сиёсӣ қарор гирифта, барои ҳифзи мақоми нахуствазирӣ ба пуштибонии Трамп ниёз дорад. Карлсон иддао мекунад, ки Натанёҳу барои ба даст овардани аксарияти 61 курсӣ дар порлумони Исроил ба дахолати сиёсии Трамп умед бастааст ва дар ғайри ин сурат мумкин аст қудратро аз даст диҳад.

Ӯ ҳамчунин иддао кардааст, ки Натанёҳу ба Пит Ҳегсет, вазири дифои Амрико, Брэд Купер, фармондеҳи Фармондеҳии марказии артиши Амрико ва чанд мақоми дигари баландпоя барои азсаргирии амалиёти густурдаи низомӣ алайҳи Эрон фишор меорад.

Карлсон дар идомаи навиштааш аз паёмадҳои эҳтимолии чунин ҳамла ҳушдор дода, гуфтааст, ки таркиши ҳастаӣ дар кӯҳи Куланг метавонад боиси олудашавии радиоактивии Халиҷи Форс ва заҳролуд шудани манбаъҳои оби ошомидании то 100 миллион нафар шавад.

Ба бовари ӯ, истифодаи силоҳи ҳастаӣ алайҳи Эрон метавонад барои кишварҳои дигари дорои чунин силоҳ низ собиқаи хатарнок эҷод кунад. Карлсон иддао дорад, ки Русия ба ҳадди ақал ду кишвари дигар гуфтааст, агар Амрико алайҳи Эрон силоҳи ҳастаӣ истифода кунад, Маскав низ метавонад истифодаи чунин силоҳро алайҳи Украина барои худ муҷоз бидонад.

Ин рӯзноманигори амрикоӣ ҳушдор додааст, ки чунин иқдом метавонад ҷаҳонро ба сӯи ҷанги сеюми ҷаҳонӣ барад.

Бо вуҷуди ин, Карлсон мегӯяд, Трамп ҳанӯз тасмими ниҳоӣ нагирифтааст ва ба дидгоҳҳои Ҷей Ди Вэнс, муовини президент ва Стив Уиткофф, фиристодаи вижаи худ, гӯш медиҳад. Ба гуфтаи ӯ, ҳар ду тарафдори ҳалли масъалаи Эрон аз роҳи музокирот ҳастанд.

“Ҳоло вақти он расидааст, ки мардум садои худро баланд кунанд“, навиштааст Карлсон ва ҳушдор додааст, ки паёмадҳои ҷанги ҳастаӣ танҳо ба Эрон маҳдуд нахоҳанд шуд.

Изҳороти Карлсон дар ҳолест, ки расонаи амрикоии Axios низ аз ихтилофи назар миёни Трамп ва Натанёҳу дар масъалаи Эрон хабар додааст. Тибқи ин гузориш, Натанёҳу хоҳони азсаргирии ҳамлаҳои низомӣ пас аз интихоботи миёндавраии Амрико аст, аммо Трамп ҳанӯз ба идомаи музокирот авлавият медиҳад.

Бедарак шудани як фаъоли зодаи Бадахшон дар Олмон

Аз ҷониби
AZDA-TV
-
0

19-уми октябри соли ҷорӣ, фаъоли зодаи Бадахшон Саидтаиб Саидмамудов дар Олмон боздошт шудааст ва бо гузашти ду ҳафта наздиконаш ҳанӯз аз маҳалли будубош ва вазъи ҳуқуқии ӯ маълумот надоранд.

Бино ба иттилои манобеи “Паём”, Саидмамудов фаъоли сиёсӣ ва намояндаи ҷомеаи помирӣ буда, дар чанд тазоҳуроти осоиштаи тоҷикон дар Олмон, аз ҷумла дар тазоҳуроти 28-уми сентябри соли 2023 дар назди сафорати Тоҷикистон дар Берлин ва эътирози 30-уми сентябри ҳамон сол дар назди Идораи канслери федералии Олмон иштирок карда будааст.

Наздиконаш аз он нигаронанд, ки Саидмамудов истирдод мешавад ва фаъолияти эътирозии ӯ метавонад дар Тоҷикистон сабаби таъқибаш шавад.

Ба гуфтаи манбаъ, ин намояндаи ҷомеаи помирӣ пас аз боздошт дар Баварияи нигаҳдорӣ мешавад. Аммо боздошти Саидмамудов ва эҳтимоли нигоҳдории ӯ дар Бавария то замони таҳияи ин хабар мустақилона тасдиқ нашудааст. Мақомоти Олмон ва Тоҷикистон ҳам дар бораи ин қазия изҳори назар накардаанд.

Дар ҳамин ҳол ба дасти “Паём” акси ҳуҷҷате расидааст, ки аз номи пулиси федералии фурудгоҳи Франкфурт тартиб дода шудааст ва дар он номи Саидтаиб Саидмамудов ва санаи 19-уми октябри соли 2026 сабт шудааст.

Дар варақа гуфта мешавад, ки ӯ дар Олмон паноҳ хостааст ва барои пешниҳоди дархости расмӣ бояд ба шуъбаи дахлдори Идораи федералии муҳоҷират ва паноҳандагон (BAMF) муроҷиат кунад.

Тибқи маълумоти Феҳристи марказии шаҳрвандони хориҷӣ, то 31-уми августи соли 2026 дар Олмон 12 ҳазору 891 шаҳрванди Тоҷикистон зиндагӣ мекарданд. Аз ин шумор 1074 нафари онҳо уҳдадории тарки кишварро доранд.

Аз миёни онҳо 922 нафар мақоми Duldung доранд. Ин мақом маънои онро дорад, ки уҳдадории тарки Олмон боқӣ мемонад, аммо ихроҷашон муваққатан боздошта шудааст. 152 нафари дигар чунин мақом надоранд.

Ҳамчунин, тибқи маълумоти ҳукумати Олмон, аз моҳи январ то августи соли 2026 аз ин кишвар ба Тоҷикистон 27 нафар ихроҷ шудаанд. Дар миёни онҳо ду зан ва як ноболиғ низ будаанд.

Масъалаи эҳтимоли бозгардондани Саидмамудов ба Тоҷикистон дар ҳолест, ки чанд фаъоли мухолифи тоҷик пас аз истирдод аз Олмон дар Тоҷикистон боздошт ва зиндонӣ шудаанд. Аз соли 2023 ба ин сӯ Абдуллоҳи Шамсиддин, Билол Қурбоналиев, Дилмурод Эргашев ва Асадулло Бобоев пас аз истирдод ба Тоҷикистон ба 7, 10, 8 ва 17 соли зиндон маҳкум шудаанд.

123...801саҳифаи 1 аз 801