Дар шаҳру ноҳияҳои Федератсияи Русия овезаҳое дар деворҳо ва маконҳои умумӣ насб шуда, ки аз муҳоҷирон даъват мешавад Русияро тарк кунанд ва ба хонаҳояшон баргарданд.
Акси як овезаеро муҳоҷире аз шаҳри Новосибирск ба Azda.tv ирсол кард, ки дар он навишта шудааст: “Муҳоҷир, хабари хуш! Марзҳо бозанд. Ту метавонӣ ба хонаат баргардӣ ва ба иқтисодиёти кишварат кумак кунӣ!“.
Ин паём ё даъват асосан ба муҳоҷирони корӣ аз кишварҳои Қазоқистон, Узбекистон, Туркменистон, Озарбойҷон, Қирғизистон, Гурҷистон, Арманистон ва Тоҷикистон нигаронида шудааст. Зеро дар ин овоза парчами ин кишварҳо ҷо дода шудааст.
То ҳол маълум нест ин иқдом дасти кори сокинони оддӣ аст ё мақомдорони рус.
Овезаҳо бо навиштаи даъват аз муҳоҷирон, ки ба хонаҳояшон баргарданд дар ҳоле дар баъзе аз кӯчаҳои Русия насб шудаанд, ки чанд вақти охир дар ин кишвар фазои муҳоҷир бадбинӣ ва тафтишу боздошти онҳо тавассути мақомоти амниятӣ авҷ гирифтааст.
Пештар аз ин даҳҳо тан аз сокинони шаҳри Котелники дар чанд муроҷиати видеоӣ ба президенти Русия Владимир Путин аз “қонуншиканӣ” ва зиёд шудани муҳоҷирон дар ин шаҳр шикоят карда, хоста буданд, ки пеши роҳи вуруди муҳоҷиронро ба Русия бояд бигирад.
Инчунин чанд вакили парлумон ва мақомдорони рус бар зидди муҳоҷирон изҳорот дода, хоста буданд, ки барои муҳоҷирон виза ҷорӣ шавад, вуруди онҳо ба кишвар манъ шавад ва ё ба ҷанг бурда шаванд.
Баъд аз ин муроҷиатҳо дар аксари шаҳру ноҳияҳои Русия “рейд”-и густурдаи муҳоҷирон оғоз шуд.
То ин муддат дар шабакаҳои иҷтимоӣ наворҳои зиёде нашр шуда, ки дар онҳо дида мешавад, мақомоти интизомии ин кишвар муҳоҷиронро гурӯҳ-гурӯҳ боздошт намуда, ба боздоштгоҳҳо мебаранд. Инчунин, дар баъзе наворҳо дида мешавад, ки муҳоҷирон дастҳо пушти сар дар замин хобидаанд ва аз ҷониби мақомоти рус нисбати онҳо таҳқир ва рафтори номуносиб сурат мегирад.
Ба гуфтаи муҳоҷирон, мақомоти амниятӣ ва интизомии Русия ба таври густарда алайҳи муҳоҷирон тафтишро оғоз када, ҷойи кор ва макони истиқомати онҳоро бозҷӯӣ намуда, шахсони асноддору беаснодро якҷоя боздошт мекунанд. Аммо онҳое, ки ҳуҷҷат надоранд боздошту ихроҷ мешаванд ва ҳатто тибқи хабарҳои тасдиқнашуда, муҳоҷирони боздоштшударо ба ҷанги Украина мефиристанд.
Идораи динии мусалмонони вилояти Маскав бо нашри изҳороте амали афсарони ОМОН-ро дар вақти “рейд”-ҳо “ваҳшиёна” номида, онро тафтиши таҳқиромез номид ва онро аз рӯи усулаш бештар на ба тафтиши ҳуҷҷатҳо, балки ба амалиёти боздошти ҷинояткорони махсусан хавфнок монанд карда буд.
