Имрӯз, 06-уми феврали соли 2023 муовини раиси Иттифоқи “Тоҷикматлубот” Хуршед Раҳмонализода зимни нишасти матбуотӣ ба хабарнигорон сабаби болоравии нархи пиёз ва хисороти маҳсулот дар анборҳои кишварро шарҳ дод.
Ба гуфтаи Раҳмонализода, яке аз сабабҳои якбора гарон шудани нархи пиёз дар бозорҳои Тоҷикистон, коҳиши ҳосили ин маҳсулоти кишоварзӣ ва кам ворид шудани он ба кишвар мебошад.
Инчунин ӯ таъкид кард, ки ҳоло дар бозорҳо нуқтаҳои фурӯши маҳсулоти кишоварзии “Тоҷикматлубот” мавҷуданд, ки дар онҳо як кило пиёз бо нархи 3,5 сомонӣ фурӯхта мешавад.
Сокинони кишвар мегӯянд, ки ҳоло нархи пиёз дар бозорҳо 8-10 сомонӣ арзиш дорад. Ҳукумат низ чанде пеш барои ба эътидол даровардани нарху навоҳо бо як қарор содироти пиёзу картошка ва сабзиро ба хориҷ боздошта буд.
Дар ҳамин ҳол муовини раиси Иттифоқи “Тоҷикматлубот” гуфт, ки аз сардиҳои зимистони имсола тақрибан 20 дарсади маҳсулоти захирашуда дар сардхонаву анборҳо талаф ёфта, барои муайян кардани ҳаҷми хисороти дақиқ ситоди махсус ташкил карда шудааст.
Хуршед Раҳмонализода мегӯяд, ки барои иҷрои Қарори Ҳукумати Ҷумҳурии Тоҷикистон «Дар бораи сари вақт омода намудани соҳаҳои иқтисодиёт ва иҷтимоиёти ҷумҳурӣ барои фаъолияти мунтазам ва самарабахш дар давраи тирамоҳу зимистони солҳои 2022-2023» дар анбору сардхонаҳои Раёсати Иттифоқи “Тоҷикматлубот” дар ҳамкорӣ бо соҳибкорон 1625 тонна пиёз, 680 тонна картошка, 100 тонна сабзӣ ва 300 тонна мева, инчунин 180 тонна ангишт низ захира карда шудааст.
Аммо Раҳмонализода мегӯяд, ки аз захиракунии маҳсулот дар мавридҳои зиёд фоида дида намешавад, чунки асоси захира – ин қонеъ кардани талабот ва андешидани тадбирҳо барои он аст, ки маҳсулот бо нархи нисбат ба бозор арзонтар дастраси мардум карда шавад.
Дар ҳоле муовини “Тоҷикматлубот” аз зарар дидани захира кардан мегӯяд, ки раисҷумҳури Тоҷикистон Эмомалӣ Раҳмон дар паёмҳояш ҳамеша ба мардум мегӯяд, ки бояд сокинон 2-сола захира кунанд. Ин гуфтаҳои Раҳмонов дар шабакаҳои иҷтимоӣ суолҳои зиёд ва баҳси зиёдеро ба бор оварда буд.
Баъд аз нишасти имрӯзаи “Тоҷикматлубот” боз сокинони кишвар суол дода истодаанд, ки агар Ҳукумат тавони захираи маҳсулотро надоранд, чӣ гуна ва дар куҷо як сокини оддӣ метавонад маҳсулотро барои ду сол захира кунад?
