Моҳи майи соли ҷорӣ Акбар Муҳиддинзода, муовини раиси ноҳияи Бобоҷон Ғафуров дар вилояти Суғд шабона як марди пиёдагардро бо мошин зада кушт, вале раиси ноҳия ӯро бегуноҳ меҳисобад.
Бино ба иттилои расонаҳо, рӯзи 31-уми июли соли 2023 Нусратулло Салимзода, раиси ноҳияи Бобоҷон Ғафурови вилояти Суғд ба хабарнигорон гуфт, муовинаш Акбар Муҳиддинзода дар як садамаи маргбори моҳи майи соли ҷорӣ бевосита ширкат дошт.
Ба қавли Нусратулло Салимзода, “Акбар Муҳиддинзода соати 1 – и шаб модари беморашро ба беморхона мебурдааст, ки садама рух додааст. Ронанда не, балки пиёдагард маст буд. Илова бар ин, ягон одам бе душман нест…”
Ин мавзеъгирии раиси ноҳияи Бобоҷон Ғафуров мавҷи вокунишҳоро дар шабакаҳои иҷтимоӣ ба вуҷуд овардааст. Хеле аз корбарон бо зери суол бурдани мантиқи раиси ноҳия мегӯянд, оё “душман” худашро дар зери чархи мошин мепартояд?
Азизулло Мирзозода, яке аз фоъолони фейсбукӣ бо зери суол қарор додани ин ҳимоят ва мавқеъгирии раиси ноҳия пурсидааст: Хулосаи мантиқӣ мебарояд, ки агар маст набошад, пас дар марги пиёдагард гунаҳ надорад?
Корбаре бо номи Зулайхо Ҳасанова мегӯяд: “Маст буд набуд, ки одамро аз ҳаёт маҳрум кард. Магар дар назди қонун ҷавобгар нест. Ё кормандони ҳукумат лгота (имтиёз) доранд? Раисаш шарм надошта боз мегӯяд, ки пиёдагард маст буд. О набошад ин ҳушёр чаро мастро зада кушту боз дар курсии раисӣ ҷавлон дорад.”
Гуфта мешавад, мақомоти корҳои дохилӣ ва прокуратура бо гузашти беш аз ду моҳ ба сурати расмӣ ҳодисаи марговаре, ки бо иштироки муовини раиси ноҳия Бобоҷон Ғафуров дар вилояти Суғд анҷом шуд, ҳеч гуна шарҳу тафсире ба расонаҳо ироа накардаанд. Аммо Рустам Амирдавлат мегӯяд: “Агар ягон шафёри мошиндори камбағал мебуду саги дари хонаи яке аз хуҷаинҳора мезад, 15 сол “строги” режим маҳкамуш мекарданд.”
Нусратулло Салимзода, дар корномаи худ беш аз 32 соли кор дар соҳаи тиббро дорад. Вай аз соли 1985 то 2004 ҳамчун пишзишк дар соҳаи тандурустӣ кор кардааст. Аз соли 2004 то 2006 директори Маркази идоракунии лоиҳаи ислоҳоти системаи тандурустии Тоҷикистон, аз соли 2006 то 2008 муовини аввали вазири тандурустӣ ва аз соли 2008 то 2017 вазири тандурустии Тоҷикистон буд.
Акнун суол инҷост, ки собиқ вазири тандрустӣ бори аввал чунин мавқеъгирӣ карда ва ё дар гузашта ҳам дар тӯли беш аз 30 соли кор дар соҳаи тандурустӣ даҳҳо мансабдори ҷинояткори дигарро ҳам мисли муовинаш “сафед” ва даҳҳо ҷабрдидаро ҳам “душман” ва ё “маст” гуфта, гунаҳкор эълон кардааст?
