Иёлоти Муттаҳидаи Амрико тавассути Агентии ИМА оид ба Рушди Байналмилалӣ (USAID) дар робита бо пандемияи COVID-19 фавран ба Тоҷикистон 2,8 миллион доллар кумак мекунад.
Бино ба иттилои сафорати ИМА дар Тоҷикистон, ин маблағгузорӣ кӯшишҳои Вазорати тандурустӣ ва ҳифзи иҷтимоии аҳолиро дар ҳамоҳангсозии омодабошӣ, интиқол ва кафолати самаранокии ваксинаи COVID-19 дар Тоҷикистон дастгирӣ менамояд. Ҳамчунин ин маблағ барои кормандони соҳаи тандурустӣ, беҳтар намудани системаи таъминоти оксиген, аз ҷумла тавассути хариди таҷҳизот ва маводҳои зарурӣ барои истеҳсол, тақсим ва расонидани оксиген ба беморон равона карда шудааст.
Сафири ИМА дар Тоҷикистон ҷаноби Поммершайм қайд намудааст: “Ман аз он шодам, ки ин як қадами муҳими мо дар талошҳои муштарак барои хотима додан ба пандемияи COVID-19 мебошад. Якҷоя фаъолият намуда, мо метавонем ин балои марговарро нест кунем ва иқтисоди ҷаҳониро барқарор намоем.”
Гуфтанист, ин маблағ илова ба 9 миллион доллар кумаки ҳукумати Иёлоти Муттаҳидаи Амрико, ки моҳи марти соли 2020 ба Тоҷикистон барои мубориза бо пандемияи COVID-19 ҷудо шуда буд, арзёбӣ мешавад.
