Корманди Хадамоти гумруки Тоҷикистон Нуъмонзода С. С. бо иттиҳоми азхудкунии маблағи калони давлатӣ аз ҷониби додгоҳи шаҳри Душанбе ба 20 соли зиндон маҳкум шуд.
Ҳамчунин додгоҳи пойтахт ду шарики Нуъмонзодаро, ки гуфта мешавад, ҳарду ҳамроҳи маҳкумшуда дар азхудкунии маблағҳои буҷет даст доранд, дар ҷустуҷӯ қарор додааст.
Хабаргузории “Sputnik” аз қавли Юсуф Раҳмон, прокурори генералии Тоҷикистон менависад, ки нозир — хазиначии бахши молиявию хоҷагии Раёсати минтақавии гумрукӣ дар шаҳри Душанбе Нуъмонзода С. С. бо суиистифода аз ваколатҳои хизматӣ аз рӯи маслиҳати пешакӣ бо соҳибкор Ҳайдаров А. Н. ва деклорант Сафаров Ш. Р. маблағҳои давлатиро аз худ кардааст.
Бино ба гуфтаи прокурори генералӣ, маҳкумшуда Нуъмонзода С. 21,7 млн сомонӣ пардохти гумрукиро ғайриқонунӣ аз хазинаи Раёсат ба суратҳисоби 4 ширкати ба соҳибкор Ҳайдаров А. Н. тааллуқдошта гузаронида, ба маблағи 9,3 млн. сомонӣ расидҳои қалбакии пардохти гумрукӣ додааст.
Нуъмонзода – тибқи маълумоти прократураи генералӣ, ба он гунаҳкор дониста мешавад, ки ӯ дар маҷмӯъ 31 млн сомонӣ маблағи пардохти гумрукиро ба буҷети давлат ворид накарда аз они худ кардааст.
