Бар асари як ҳамлаи мусаллаҳона дар тамирингоҳи низомиёни рус дар вилояти Белгороди Русия дасти кам 11 нафар кушта ва 15 нафари дигар захмӣ шудаанд.
Бино ба иттилои Вазорати дифои Русия шоми 15-октябри соли ҷорӣ ду сарбоз ҳангоми тамринҳои низомӣ ба сӯи ҳамяроқони худ тир кушода 11 нафарро кушта ва чанд нафари дигарро захмӣ карданд ва сипас худи онҳо аз тарафи дигар сарбозон кушта шуданд.
Мақомоти рус ангезаи аслии ин ҳуҷуми мусаллаҳонаро шарҳ надодаанд, аммо ин ду нафари муҳоҷимро шаҳрвандони яке аз кишварҳои Осиёи Марказӣ гуфта, онҳоро “террорист” хонанд.
Аммо баъзе расонаҳо ба нақал аз манобеашон ин ду нафарро шаҳрвандони Тоҷикистон гуфтаанд. Ҳамзамон дар баъзе каналҳои телеграмӣ аз муҳоҷимон шаҳрвнадони Узбекистон ном бурдаанд.
Ба иттилои манобеи гуногун, дар ин тамрингоҳ дар вилояти Белгород, ки бо Украина ҳаммарз аст, мақомоти низомии Русия сарбозонро пас аз эълони басиҷи нерӯҳо ба онҷо бурда тамрини низомӣ медодаанд.
Дар ҳамин ҳол расонаи русии “Astra” иттилоъ дод, ки як хабарнигораш рӯзи 16-уми октябр тавониста бо яке аз захмишудгон ҳамсуҳбат шавад ва қазияро ба тафсил нақл кардааст. Ба гуфтаи ин сарбози захмишуда, нафарони ҳамлагар шаҳрвандони Тоҷикистон буда, даргирӣ ба сабаби баҳсҳои динӣ сар задааст.
