Рӯзи 19-уми апрели соли 2023, Иттиҳоди Аврупо ва Тоҷикистон ҷаласаи 3-юми зеркумитаи Ҳамкориҳои рушд “3rd Sub-Committee on Development Cooperation”-ро дар Душанбе баргузор карданд.
Дар ин ҷаласа сафири ИА дар Тоҷикистон Раймундас Кароблис ва муовинаш Петра Гаспарова ширкат доштанд.
Бино ба иттилои Намояндагии ИА дар Тоҷикистон, ҷонибҳо аз рафти иҷроиш ва натиҷаҳои барномаи ҳамкориҳои дуҷониба гуфта, масъалаҳои рақамисозӣ, энергетикаи сабз, саноаткунонӣ ва соҳаи кишоварзиро баррасӣ карданд.
Гуфта мешавад, Иттиҳоди Аврупо барои дастгирии рушди Тоҷикистон (2021-2024) 91 миллион евро грант ҷудо намудааст. Илова бар ин, Тоҷикистон аз барномаҳои минтақавӣ барои Осиёи Марказӣ, аз ҷумла Ташаббуси Гурӯҳи Аврупо дар мавриди захираҳои об, энергетика ва тағйирёбии иқлим кӯмак дарёфт мекунад.
