Муҳиддин Кабирӣ, раҳбари Паймони миллии Тоҷикистон мегӯяд, рафтори бераҳмонаи мақомоти интизомии Русия нисбати муҳоҷирони тоҷик муқаддимае барои сафари Лавров ба Тоҷикистон буд.
Раҳбари ПМТ 6-уми июни соли ҷорӣ дар робита ба сафари Сергей Лавров ба Тоҷикистон дар суҳбат ба Azda tv гуфт, ки яке аз ҳадафҳои сафари вазири хориҷаи Русия ба кишвар ин розикунонидани Раҳмон барои пайвастан ба Иттиҳоди гумрукии АвруОсиё мебошад.
Кабирӣ мегӯяд, аллакай маълум шуда истодааст, ки фишорҳо болои муҳоҷирон бо кадом мақсад роҳандозӣ шуда буд. Усули фишор болои муҳоҷирон, “яке аз усулҳои бисёр санҷидашуда ва нуқтазаъфи аслии Раҳмон аст, ки русҳо онро хуб медонанд” ва хуб анҷомаш медиҳанд. Ва ҳаргоҳ агар масъалаи сиёсии ҳалношуда байни Кремлин ва Душанбе ба вуҷуд биёяд, Русия барои расидан ба хостаҳояш аз ин “нуқтаи заъфи Тоҷикистон” моҳирона истифода мебарад.
“Барои мисол, вақте Тоҷикистон хост мисли Қирғизистон барои ҳузури пойгоҳи низомии Русия маблағ биситонад, ва даъво кард, русҳо фишорро болои муҳоҷирон зиёд карданд ва шуруъ карданд ба ихроҷи муҳоҷирони тоҷик, ки ин барои Тоҷикистон бисёр як масъалаи дарднок аст. Ва баъд аз ин билофосила вазири дифои Русия ба Душанбе сафар кард ва Тоҷикистон дигар ҳеч сухане дар бораи пардохти маблағ барои пойгоҳи низомӣ нагуфт ва бисёр ҳам ором барои 50 соли дигар ба онҳо иҷозат дод дар хоки кишвар бошанд ва бидуни ҳеч пардохте.”, мегӯяд Муҳиддин Кабирӣ.
Бино ба гуфтаи Кабирӣ, аз ин нигоҳ русҳо манфиатдоранд, ки Эмомалӣ дар сари қудрат бимонад, зеро ҳар президенти дигаре омад дар Тоҷикистон, ӯро наметавонанд мисли Раҳмон таҳти фишор қарор бидиҳанд.
Ёдовар мешавем, ки тай ду-се ҳафтаи ахир мақомоти интизомии Русия бо баҳонаи тафтиши асноди муҳоҷирон садҳо тоҷикистониро боздошт ва ҳатто бераҳмона латтукӯб карданд. Дар шабакаҳои иҷтимоӣ наворҳои зиёде аз бадрафтори мақомоти Русия нисбати муҳоҷирон нашр шудааст.
Дар пасманзари ин ҳаракатҳои ғайриқонунии мақомоти Русия мақомоти тоҷик, аз ҷумла вазирони дохила ва хориҷа, Омбудсмен ва Додситони кулли Тоҷикистон ба ҳамтоёни худ номаҳо ирсол намуда, хостори таҳқиқи қазия боздоштҳо шуданд, аммо то рафт ин бархӯрди хашини мақомоти Русия дар баробари муҳоҷирони тоҷик бештар шуд.
