Эмомалӣ Раҳмон аз замони сафар ба Олмон ва нишасти сарони кишварҳои Осиёи Марказӣ ва Олмон дар Берлин то ҳол ба сурати физикӣ дар назди дурбини расонаҳо пайдо нашудааст.
30-уми сентябри соли 2023 Хадамоти матбуоти Президенти Тоҷикистон хабар дода буд, ки Эмомалӣ Раҳмон “баъди анҷоми сафари корӣ дар Ҷумҳурии Федеративии Олмон аз шаҳри Берлин ба Ватан” баргашт.
Аммо ҳамон рӯз дар хеле аз сомонаҳои радёбии ҳавопаймоҳо дида шуд, ки ҳавопаймои ҳомили Президенти Тоҷикистон на ба шаҳри Душанбе, балки нахуст ба фурӯдгоҳи Зурих дар Суис (Шветсария) ва аз он ҷо ба фурӯдгоҳи Ашқобод, пойтахти Туркманистон парвоз кардааст.
4-уми октябри соли ҷорӣ котиботи Эмомалӣ Раҳмон бо нашри як навори ӯ дар бораи табрикот ба рӯзи забонро нашр карда буд, ки замони сабти он навор маълум набуд.
5-уми окятябри моҳи равон Эмомалӣ Раҳмон зодрӯз дошт, бархе сарони кишварҳои Осиёи Марказӣ, Русия ва Озарйбоҷу Туркия ҳам ба ӯ мактуби шодбошӣ фиристода буданд. Хадамоти матбуоти Президенти Тоҷикистон ҳам иттилоъ дода буд, ки раисҷумҳур бо шуморе аз раҳбарони давлатҳо телефонӣ суҳбат кардааст.
Гуфта мешавад, 7-уми октябр дар рӯзи зодрӯзи Владимир Путин, ки ду рӯз пеш ӯ Эмомалӣ Раҳмонро ба муносибати 71-солагиаш табрик гуфта буд, Эмомалӣ занг зада бо ӯ суҳбати телефонӣ доштааст.
8-9-уми моҳи ҷорӣ чанде аз раҳбарони воломақоми кишвари Арабистони Саудӣ, аз он ҷумла Раиси иҷроияи Фонди рушди Саудӣ Султон ибни Абдурраҳмон Ал-Маршад ба Тоҷикистон ташриф оварда ва аз омодагии кишвараш дар сармоягузорӣ кардан ба НБО Роғун хабар дод, аммо ӯро на Эмомалӣ Раҳмон, балки писараш Рустами Эмомалӣ қабул карда буд.
Пеш аз ин бархе манобеи Azda.tv иттилоъ дода буданд, ки “пас аз он ки мухолифин мошини ҳомили Эмомалӣ Раҳмонро дар Берлин бо тух заданд ва алайҳи ӯ ҳамоишҳои эътирозиеро бо шиорҳои “диктатор истеъфо”, “диктарор истеъфо” баргузор карданд, вазъи саломатии Президенти Тоҷикистон бад шуд. Ба ҳамин хотир, Эмомалӣ Раҳмон мустақим ба Душанбе не, балки ба бемористоне дар Зурихи Суис рафт, то аз ташхиси табибони худ гузарад.” Ин иттилоро Azda.tv натавонист аз дигар манбаъҳои расмӣ ва ҳукуматӣ тасдиқ кунад.
Гуфта мешавад, Эмомалӣ Раҳмон дар гузашта ҳам борҳо бо сабабҳои мухталиф ба муддатҳои тӯлонӣ аз чашми мардум ва расонаҳо нопадид шуда буд, аммо чун ин дафъа баъд аз эътироз ва зада шудан бо тухм аз сӯи мухолифин, ки дар хеле аксу наворҳо ба шиддат нороҳату хашмгин буданаш маълум аст, суолҳои зиёдеро дар ҷомеа ба вуҷуд овардааст.
