Вазорати мудофиаи Тоҷикистон рӯзи 31-уми октябр хабар дод, ки дар давоми як моҳ беш аз 20 шаҳру навоҳии кишвар нақшар даъвати сарбозон ба артишро 100 дарсад иҷро карданд.
Ин ниҳоди кишвар мегӯяд, дар нахустин рӯзи даъват, шаҳру навоҳии ВМКБ, ноҳияҳои Рашт, Сангвор, Лахш, Нуробод, Тоҷикобод, Вахш ва Фархор аввалин шуда дар ҷумҳурӣ иҷрои нақшаро пурра ба анҷом расониданд.
Ҳамзамон дар хабар гуфта мешавад, ки дар давоми моҳи октябр шаҳру ноҳияҳои Носир Хусрав, Норак, Левакант, Данғара, Дӯстӣ, Роғун ва ноҳияи Исмоили Сомонии пойтахт низ аз иҷрои пурраи нақшаи пешбинишуда гузориш додаанд.
Ба иттилои манбаъ, нақшаи даъвати сарбозон ба артиш дар Вилояти Мухтори Кӯҳистони Бадахшон дар рӯзи аввал 100% иҷро шуд, аммо дар муддати ин як моҳ ноҳияҳои тобеи марказ нақшаро 80%, вилояти Хатлон 79%, шаҳри Душанбе 72%, вилояти Суғд 65% иҷро кардаанд.
Гуфта мешавад, дар маҷмуъ нақшаи тирамоҳии даъвати сарбозон дар саросари кишвра 75% иҷро шудааст. Мақомоти кишвар иддао дорад, ки ба ин зудӣ қариб ба поён расидани нақшаи даъвати сарбозон баёнгари “ҳамкории зич”-и мақомоти шаҳру ноҳияҳо бо мардум ва хусусан бо ҷавонон аст.
Аммо воқеияти ҳол нишон медиҳад, ки кормандони комиссариятҳои ҳарбӣ дар шаҳру ноҳияҳо, кӯчаву бозорҳо ҷавонони ба синни даъватро “облава” намуда, зӯран ба артиш мебаранд. Ин бархӯрди хашини кормандони ҳарбӣ солҳост мавриди баҳсҳои тунд дар ҷомеа қарор мегирад. Вале то ҳол мақомоти болоии кишвар барои беҳбуди ин рафтори ноҷо иқдоме накардаанд.
