Тоҷикистон тасмим гирифта, ки иқтидори истеҳсоли “энергия сабз”-ро дар кишвар ду баробар афзоиш диҳад.
Бино ба иттилои расмӣ, Эмомалӣ Раҳмон ҳангоми суханронӣ дар нишасти Созмони Милали Муттаҳид (СММ) дар Дубайи Имороти Муттаҳидаи Арабӣ гуфта, ки “Тоҷикистон 98 фоизи барқи худро дар нерӯгоҳҳои барқи обӣ истеҳсол” мекунад.
Президенти Тоҷикистон таъкид кард, ки Тоҷикистон “аз рӯйи фоизи тавлиди “энергияи сабз” аз манбаъҳои таҷдидшаванда дар ҷаҳон ҷойи шашумро ишғол менамояд.” Ва қасд дорад, ки “дар оянда иқтидори истеҳсоли “энергия сабз”-ро ҳамчун заминаи асосии пешбурди “иқтисоди сабз” ду баробар афзоиш” диҳад.
Эмомалӣ Раҳмон, ки дар иҷлосияи пленарии Конфронси 28-уми ҷонибҳои Конвенсияи қолабии СММ доир ба тағйирёбии иқлим суҳбат мекард, афзуд, “Тоҷикистон, ки 93 фоизи қаламрави онро кӯҳҳо ташкил медиҳанд, рӯ ба рӯйи пайомадҳои тағйирёбии иқлим яке аз кишварҳои осебпазир ба шумор рафта, ҳамасола бо обхезӣ, сел, фаромадани ярчу тарма ва дигар офатҳои табиии марбут ба об дучор мешавад.”
Инчунин вайт илова кард, ки дар чанд соли ахир “шумораи умумии пиряхҳои Тоҷикистон, ки 13 ҳазорро ташкил дода, манбаи шаст фоизи обҳои минтақаи мо мебошанд, ба андозаи зиёда аз як ҳазор кам гардидааст.”
Ҳамзамон Эмомалӣ Раҳмон бо гилоя аз он ки тағйирёбии иқлим пеш аз ҳама ба манбаъҳои захираҳои об таъсири манфӣ мерасонанд, гуфт, ки ҷомеаи ҷаҳонӣ набояд ин амрро нодида бигарад.
Инчунин вай иброз дошт, ки Тоҷикистон тасмим гирифтааст, ки саҳми молии аввалияи худро ба “Фонди мақсадноки байналмилалӣ оид ба масъалаҳои ҳифзи пиряхҳо”, ки ба тозкӣ таъсис дода шудааст, гузорад.
