Парлумони Иттиҳоди Аврупо 17-уми январи соли ҷорӣ вазъи ҳуқуқи башар ва озодии матбуот дар Тоҷикистонро баррасӣ карданд.
Шуморе аз вакилони ИА дирӯз зимни суханорониҳояшон аз мақомоти Тоҷикистон интиқоди шадид намуда, иброз доштанд, ин кишвар бо баҳонаи мубориза бо терроризм ва ифротгароӣ рӯзноманигорону озодандешони зиёдеро барои солҳои тӯлонӣ зиндонӣ кардааст.
Комиссари ИА дар умури танзими ҷойҳои корӣ ва ҳуқуқҳои иҷтимоӣ Николас Шмит мегӯяд, озодии баён ва матбуот яке аз принсипҳои асосоии ин иттиҳодия аст ва идомаи фишору маҳдудсозии мақомоти тоҷик дар масоили ҳуқуқи башар ва озодии васоити ахбори омма ба ояндаи муносибати Иттиҳоди Аврупо бо Тоҷикистон таъсири худро хоҳад расонд.
Намояндагони парлумони Иттиҳодияи Аврупо аз он изҳори таассуф кардаанд, ки ВАО дар Тоҷикистон дар як муҳити сахти монеагузоришуда, таъсири сиёсӣ ва набудани гуногунрангӣ маҳдуд боқӣ мемонад.
Иттиҳодияи Аврупо ҳамчунин аз нигарониҳои Намояндаи САҲА дар умури озодии ВАО хонум Рибейро ёдовар шуда, ки номбурда моҳи октябри соли 2022 дар ҷараёни боздидаш аз Тоҷикистон дар бораи теъдоди зиёди хабарнигорони зиндонӣ ва ҳамчунин монеаҳои идомадор дар роҳи озодии ВАО гузориш дода, аз чунин вазъият изҳори нигаронӣ карда буд.
Инчунин ИА Тоҷикистонро ба хотири амнияти ҷисмонӣ ва ҳуқуқии рӯзноманигорон, танзими ВАО, аккредитатсияи кормандони ВАО ва адами дастрасӣ ба иттилоот интиқод намуадааст.
Парлумони Аврупо мегӯяд: “Ҳукумати Тоҷикистон бо истифода аз далоили амниятӣ, мубориза бо терроризм ва мубориза бо радикализми исломӣ рафторҳои маҳдудкунандаи худро асоснок мекунад. Дар ҳоле ки ИА ин нигарониҳои амниятии Тоҷикистонро эътироф мекунад, аммо ин тадбирҳоро мутаносиб намедонад.”
Ёдовар мешавем, ки Иттиҳоди Аврупо дар нишасте марбут ба ҳуқуқи башар ва озодии ВАО, ки 14 декабри соли 2023 дар Душанбе баргузор шуд, вазъи расонаҳои мустақил ва рӯзноманигоронро баррасӣ карда буд. Дар он нишаст Иттиҳодияи Аврупо аз Тоҷикистон даъват кард, ки озодии ВАО-ро таъмин намояд. Вале бо вуҷуди таъкидҳои ҳамешагӣ ва гузоришҳои созмонҳои ҷаҳонӣ дар бораи бад будани вазъи ҳуқуқи инсон дар Тоҷикистон мақомоти тоҷик ин интиқодоту мулоҳизаҳоро нодида мегиранд, ки ба гуфтаи коршиносон, дар ояндаи наздик ба мақоми кишвар дар сатҳи байналмилаӣ латмаи бузурге ворид мекунад.
