Мақомоти покистонӣ пас аз 10 рӯз бархе гузаргоҳҳои марзӣ байни Афғонистон ва Покистонро боз карданд.
Бино ба иттилои расонаҳои афғонистонӣ, субҳи имрӯз, 23-уми январи соли 2024 гузаргоҳи Турхами Ҷалолобод, Харлочии Пактиё ва Ғуломхони Хустро ба рӯи мошинҳои борбар боз карданд.
Мақомоти покистонӣ яке аз далелҳои баста шудани гузаргоҳҳои марзӣ байни ду кишварро дар надоштани шиноснома, виза ва камбуди дигар асноди ронандаҳои мошинҳои борбар унвон мекарданд, аммо ба гуфтаи бархе коршиносон, танишҳои сиёсӣ байни Кобул ва Исломобод собиқаи тӯлонитар доранд.
Исломобод Кобулро ба пуштибонӣ ва ҳимоят кардан аз нерӯҳои Таҳрики Толибони Покистон (ТТП) муттаҳам мекунад, аммо Кобул ин иддаоҳоро борҳо рад карда, гуфтааст, ки Покистон бояд масоил ва мушкилоти дохилии худашро бидуни иттиҳоми ҳамсояҳо бо роҳҳои гуфтугӯ худаш бояд ҳаллу фасл кунад.
Покиситон дар давоми чанд моҳи ахир ба баҳонаи надоштани ансноди расмӣ барои будубош дар ин кишвар беш аз 500 ҳазор муҳоҷирони афғонистонро ихроҷ кар ва ҳудуди як миллион нафар аз муҳоҷирони афғонистониро маҷбур карда, ки хоки ин кишварро тарк кунанд.
Аз сӯи дигар, Асад Дуронӣ, собиқ раиси истихбороти (ISI) дар суҳбате бо бархе расонаҳои ин кишвар гуфтааст, ки ихроҷи муҳоҷирони афғонистонӣ аз Покистон сиёсати иштибоҳӣ аст ва сард шудани равобит байни Покистон ва Толибон ба нафъи Исломобод нест.
Пеш аз ин Толибон таҳдид карда буданд, ки агар Покистон ба таваққуфи гузаргоҳҳои марзӣ байни ду кишвар идома диҳад, Ҳукумати муввақат барои ҳамеша ин гузаргоҳҳоро мебандад.
Пеш аз ин Нахуствазири муваққати Покистон Анворулҳақ Кокар гуфта буд, ки қочоқи бархе молу колоҳои тиҷоратӣ аз Афғонистон ба Покистон ба иқтисоди ин кишвар зарар овардааст. Вай аз мақомоти кишвараш хоста буд, ки назорат аз болои гузаргоҳҳои марзии Турхам, Чаман, Ғуломхонро сахттар кунанд.
Гузаргоҳи Турхам, ки яке аз бузургтарин гузаргоҳҳои интиқоли молу колоҳои тиҷоратӣ байни Покистону Афғонистон аст ва аксари молу колоҳои транзитии кишварҳои Осиёи Марказӣ, бахусус молу колоҳои тиҷоратии тоҷирони кишварҳои Тоҷикистону Узбекистон низ аз ҳамин масир интиқол дода мешаванд. Бозу баста будани ин масир ба бозори истеъмолии Тоҷикистон, ки дар ин фасл бештар картошкаву пиёз ва шакарро тоҷирон аз Покистон ворид мекунанд, хеле таъсир дорад.
Баста шудани ин гузаргоҳҳоро ҷониби Покистон дар надоштани шиноснома, виза ва набудани ҳуҷҷатгузориҳои дуруст аз ҷониби ронандагони мошинҳои борбарии Афғонистон арзёбӣ мекунанд. Аз сӯи дигар, Толибон ҳам дар муқобил назорат аз болои шиноснома, виза ва дигар асноди ронандаҳои мошинҳои борбарии покистониро сахттар кардаанд.
