Додгоҳи олии Тоҷикистон ҳукми муттаҳамон дар қатли Шуҳрат Исматуллоев, муовини аввали Ҳасан Асадуллозода раиси “Ориёнбонк”-ро содир кард.
Мурофиаи додгоҳии ин гурӯҳ 18-уми марти соли ҷорӣ дар Боздоштгоҳи муваққатии шаҳри Душанбе баргузор шуда, додрас Дилшод Саидмуродов, маъруф ба “Дилшоди СБ”, Қамар Азизов, Акбар Аҳмадов, Бахтовар Сафаров ва Шоҳрух Хӯҷаевро ба ҳабси якумрӣ маҳкум кард.
Инчунин нуҳ нафари дигар бо иттиҳомҳои гуногун, аз ҷумла хабар надодан дар бораи ҷиноят аз 1 то 8 сол зиндонӣ мешаванд.
Гуфта мешавад, бар асоси ҳукми додгоҳ, амволи баъзе аз муттаҳамон, аз ҷумла Дилшод Саидмуродов мусодира мешаванд. Пайвандони Саидмуродов дар суҳбат ба Радиои Озодӣ гуфтаанд, ки аз ҳукми додгоҳ норозианд.
Додгоҳи олӣ низ то ҳол расман дар ин бора чизе нагуфтааст.
Ёдовар мешавем, ки 23-уми июни соли 2023 хабари рабуда шудани муовини раиси “Ориёнбонк” Шуҳрат Исматуллоев расонаӣ шуд. Мақомот пас аз ҷустуҷӯи зиёд 12-уми август тавонистанд ҷасади Шуҳратро аз аз мавзеи Саразми Панҷакент пайдо кунанд.
Юсуф Раҳмон, додситони кулли Тоҷикистон, моҳи феврали соли ҷорӣ зимни нишасти матбуотӣ ба рӯзноманигорон гуфта буд, ки дар робита ба ин қазия нисбати 18 нафар парвандаи ҷиноятӣ кушодаанд ва ҳоло 14 нафарашон дар курсии айбдорӣ нишастаанд. Аммо ду нафари дигар дар кофтукоб ва ду нафари дигар (Рустам Ашӯров ва Парвиз Мустафоқулов) фавтидаанд.
