Чандест сокинони шаҳри Душанбе аз вазъи тозагии шаҳр, аз ҷумла тоза накадани партовгоҳҳои назди баландошёнаҳо шикоят доранд.
Имрӯзҳо наворҳое дар шабакаҳои иҷтимоӣ нашр шуда, ки дида мешавад, анбуҳи зиёде аз партовҳо дар назди хонаҳои истиқоматии сокинон ҷамъ шудааст ва кормандони комуналии шаҳр онҳоро сари вақт нагирифта ва партовгоҳро низ тоза накардаанд.
Корбаре бо номи мустаори Ozodi Ozodi наворе нашр карда, ки вазъи бади як партовгоҳроеро дар кӯчаи Сомон 33/1 ноҳияи Сомонии шаҳри Душанбе нишон медиҳад. Бо нашри навор ин корбар навишта, ки “Мо чи тавр метавонем, сайёҳони хориҷиро ба кишвар даъват намоем, хориҷиён инро бинанд, айб ҳаст, шармаст…”
Аксар вақт сокинони пойтахт аз он нигаронӣ мекунанд, ки сари вақт тоза накардани партовгоҳҳои шаҳр, ки бӯи бади он ба хонаҳо меравад, хусусан бо фаро расии баҳору оғози ҳавои гармӣ ин вазъ агар идома пайдо кунад, сабаби афзоиши бемориҳои зиёде мешавад.
Бори аввал нест, ки сокинон аз тоза накардани партовҳо дар шаҳри Душанбе шикоят мекунанд, хусусан дар фасли тобистон чунин шикоятҳо бештар мешаванд.
Сокинон дар хитоб ба масъулини шаҳр мегӯянд, ки дар телевизионҳо ҳамеша аз ободкорӣ ва тозагӣ намоиш медиҳед, гоҳҳо ин бемасъулиятии масъулони комуналӣ ва дигар масъулини дахлдорро низ намоиш диҳед то дар фикри саломатии мардум бошанд, зеро ин партовҳо сабаби аслии пайдоиши бемориҳост.
Вале то ҳол ҳам шаҳрдорӣ ва ҳам дигар ниҳодҳои марбута хомӯшанд ва ба ин наворҳо ва дархости батакрори сокинон посухе надодаанд.
