Ҳамрохон Зарифӣ, вазири собиқи хориҷаи Тоҷикистон ва Акбаркашоҳ Искандаров, раиси собиқи Шӯрои Олӣ ва иҷрокунандаи вазифаи президент аз ҷониби мақомот боздошту бозпурсӣ шудаанд.
Боздошти ин сиёсатмадорони бознишаста дар пасманзари боздошти собиқ раиси Ҳизби демократии Тоҷикистон Саидҷаъфар Усмонзода, ки ба нақшаи “ғасби ҳокимият” гумонбар аст, рӯзи 12-уми июни соли ҷорӣ сурат гирифтааст.
Бино ба иттилои манобеи Радиои Озодӣ, Ҳамрохон Зарифӣ то рӯзи 16-уми июн дар боздоштгоҳи Вазорати корҳои дохилӣ дар Душанбе нигаҳдорӣ мешуд, вале ҳоло маълум нест, ки ӯ то ҳол дар боздошт аст ё озод шудааст.
Ба иддаои манбаъ, боздошти вазири собиқ ба ҷинояти иқтисодӣ ва ба кораш дар сохтмони бинои Вазорати корҳои хориҷӣ рабт доштааст, аммо тасдиқи ин гуфтаҳо аз ҷойи дигар ғайриимкон аст.
Дар ҳамин ҳол пойгоҳи хабарии “Бомдод” навиштааст, ки мақомот Акбаршо Искандаровро низ ҳамроҳи ронандаи собиқаш боздошт кардаанд, аммо ронандаи ӯро баъди чанд рӯз ҷавоб додаанд. Гуфта мешавад, ин шахс 5 соли охир бо Искандаров кор намекардааст.
Дар бораи сарнавишти худи Искандаров ва ба чӣ гумонбар ё айбдор шудани ӯ иттилои дақиқе дар даст нест, аммо манобеи “Бомдод” гуфтаанд, ки 14-уми июн мақомот хонаи ӯро дар маҳаллаи Ҳаёти Нав кофтуков карда, “он рӯз чизи зиёд бароварда, бо худ бурданд”.
Пештар аз ин Муҳаммадиқболи Садриддин, мудири шабакаи “Ислоҳ” ва Додоҷон Атовуллоев, раҳбари “Ватандор” аз боздошту бозпурсии беш аз 50 нафар собиқадорони Ҳукумат ва мухолифин, аз ҷумла собиқ вазири корҳои дохилӣ Ёқуб Салимов ва собиқ қумондони оппозитсия ва аъзои Ҳукумат Саламшо Муҳаббатов, полковник ва собиқ сардори гурӯҳи зиддитеррористии “Алфа”-и КДАМ ва ғайраҳо хабар дода буданд.
Мақомоти Тоҷикистон то ҳол ин боздошту бозпурсиҳои чеҳраҳои шинохтаи кишварро шарҳ надодаанд.
Аммо ин боздоштҳо дар ҳоле сурат мегиранд, ки Додситони кулли кишвар Юсуф Раҳмон вақте аз парлумон бекор кардани дахлнопазирии вакилии Усмонзодаро дархост мекард, гуфта буд, ки парвандаи ҷиноятӣ бо иттиҳоми “ғасби ҳокимият” ба зидди Саидҷаъфар Усмонзода ва “дигарон” кушода шудааст.
