Дар сӯхтори бозори марказии ноҳияи Ҷайҳун садҳо нафар аз тоҷирону соҳибкорон зарар дидаанд ва хеле аз онҳо ба фарзияи мақомоти тафтишот бовар надоранд.
Бино ба иттилои расмӣ, шаби 1-ум ба 2-юми июли соли 2024 дар бозори марказии ноҳияи Ҷайҳуни вилояти Хатлон сӯхтор ба амал омад.
Вазорати корҳои дохилии Тоҷикистон гуфтааст, ки вақте ин сӯхтор оғоз шуд, ҳам нерӯҳои сӯхторхомӯшкунӣ ва ҳам даҳҳо нафар аз кормандони дигар сохторҳои кишвар ба ҷои ҳодиса рафтанд.
Аммо дар бархе аксу наворҳое, ки аз ҷои ҳодиса гирифта шуда ва ба шабакаҳои иҷтимоӣ роҳ ёфтаанд, дида мешавад, ки алангаи оташ хеле барвақттар даҳҳо дукону мағозаро ба коми худ фурӯ бурда ва баъди чанд муддат мошинҳои сӯхторхомӯшкунӣ ба ҷои ҳодиса расидаанд.
Вазорати корҳои дохилии Тоҷикистон низ дертар ба ҷойи ҳодиса расидани кормандони худро эътироф карда, гуфтааст: “Ҳангоми ба ҷойи ҳодиса ҳозир шудани оташнишонон муайян гардид, ки сӯхтор растаҳо ва нуқтаҳои савдоро дар масоҳати 2830 метри мураббаъ фаро гирифта, хавфи паҳншавии он ба миён омадааст.”
Инчунин дар ин навор ба хубӣ дида мешавад, ки шиддати алангаи ин сухтор он қадар бузург аст, ки аз дурии чанд километр роҳ ҳам дуди ғализи ба осмон печидаи он дида мешавад ва сари вақт кормандони сухторхомӯшкунони Вазорати корҳои дохилӣ натавонистаанд, ки пеши роҳи густариш ин сухторро бигиранд.
Ин хабар дар ҳоле таҳия ва нашр мешавад, ки ҳанӯз мақомоти корҳои дохилӣ ва дигар сохторҳои давлатӣ тафтишоти худро пурро ба анҷом наросонидаанд ва ҳаҷми умумии зарарҳоро ҳам то ҳол эълон накардаанд.
Ба гуфтаи яке аз зарардидаҳо, масофаи роҳ аз бозор то бинои мақомоти сӯхторхомӯшкунии Вазорати корҳои дохилӣ дар ноҳияи Ҷайҳун камтар аз 2 километр роҳ аст. Сӯхтор соати 10:47-и шаб оғоз шуд. Он замон аксар кӯчаҳои ноҳия холӣ ва ҳеч гуна танбашавии нақлиёт вуҷуд надошт. Агар мақомоти сӯхторхомӯшкунӣ мехостанд, ки сӯхторро сари вақт хомӯш кунанд, метавонистанд, ки дар зарфи камтар аз 10 дақиқаи аввал худро ба ҷои ҳодиса бирасонанд ва аз густариши он пешгирӣ намоянд, аммо ин корро накардаанд. Ба ҳамин хотир, бовар кардани ба фарзияи мақомоти тафтишотӣ, ки мегӯянд, “расиши ноқилҳои барқӣ сабаби сар задани сӯхтор шудааст”, бовар накарданист.
Гуфта мешавад, ин бозор бозори Раёсати ҷамъияти матлуботи ноҳияи Ҷайҳун аст. Ин бозор якумин бозоре нест, ки дар Тоҷикистон сӯхта, молу колоҳои мардум дар чанд соат ба хокистар табдил мешаванд, балки чунин сӯхторҳо дар дигар бозорҳои ҷумҳурӣ зиёд ба қайд гирифта шудааст. Мақомоти тафтишотӣ ҳам сабаби аксари ин сӯхторҳоро “расиши ноқилҳои барқӣ” эълон карда буданд.
