Дар Тоҷикистон қонунеро қабул карданд, ки тибқи он сокинон барои истифодаи “ғайриқонунӣ” ва “напардохтани пули нерӯи барқ” ҷарима ё зиндонӣ мешаванд.
Ин қонун 2-апрели соли ҷорӣ аз ҷониби вакилони Маҷлиси намояндагони кишвар баррасӣ ва қабул гардидааст. Дар қонун гуфта мешавад, афроде, ки қоидаҳои истифодаи нерӯи барқро вайрон мекунанд, аз 27000 то 90000 сомонӣ ҷарима ва ё аз 3 то 10 сол ба зиндон маҳкум мешаванд.
Гуфта мешавад, ин навъи ҷазо дар ҷаласаи васеи Ҳукумат рӯзи 27-уми март аз ҷониби раисҷумҳури худкомаи Тоҷикистон Эмомалӣ Раҳмон садо дода буд ва дар давоми камтар аз даҳ рӯз тағйиру иловаҳо ба тарҳи қонун “Дар бораи ворид намудани иловаҳо ба Кодекси ҷиноятӣ” ва тарҳи қонун “Дар бораи ворид намудани тағйирот ба Кодекси ҳуқуқвайронкунии маъмурӣ”-ро Вазорати адлия таҳия намуда, онро вазири ин ниҳод Музаффар Ашӯриён дар назди вакилон муаррифӣ кардааст.
Тибқи ин тарҳ, ба Кодексияи ҷиноӣ моддаи нав (2531) илова мегардад, ки ҷавобгарии ҷиноятиро барои вайрон намудани қоида ва меъёрҳои истифодаи барқ пешбинӣ мекунад.
Хабари қабули ин тарҳи қонун аз ҷониби вакилон дар ҳолест, ки дар Тоҷикистон маҳудиятҳои зиёде дар истифодаи нерӯи барқ амал мекунад, аз ҷумла муштариёне, ки зиёда аз 10 ҳазор киловат соат дар як моҳ барқ истифода мебаранд, арзиши барқ бо нархи корхонаҳои тиҷоратӣ барояшон ҳисоб карда мешавад ва то имрӯз мақомот 250 чунин муштаририро номнавис кардааанд.
Инчунин тибқи қарори нави Ҳукумати кишвар, аз 1-уми апрели соли 2025 арзиши нерӯи барқ низ боло рафт. Сокинон барои ҳар киловат соат барқ ба ҷойи 30,37 дирам 35,36 дирам пардохт хоҳанд кард.
Ва ин ҳама маҳдудияту гаронӣ дар ҳолест, ки сокинони кишвар аз камбуди барқ ранҷ мекашанд ва маълум нест раисҷумҳур ва масъулин дар баробари ин маҳдудиятҳо барои бартараф намудани ин мушкилот чӣ иқдоме гирифтаанд.
Ба гуфтаи огоҳон, онҳое, ки пули барқро пардохт намекунанд, бештар корхонаҳои давлатӣ ва корхонаву шахсонеанд, ки ба хешовандони мансабдорони баландпоя тааллуқ доранд, ки ҳар киловат нерӯи барқро аксари ин корхонаҳо аз сокинон арзонтар хариддорӣ мекунанд.
