Дар натиҷаи бастани гузаргоҳҳои марзӣ аз сӯи артиши Исроил ва пешгирӣ аз вуруди кумакҳои инсонӣ ба Ғазза, қаҳтӣ ва гуруснагӣ дар ин борика ба сатҳи бисёр хатарнок расидааст.
Дар ин бора рӯзи 6-уми май Ожонси оворагони фаластинии Созмони Миллали Муттаҳид (UNRWA) хабар дод. Сухангӯи ин ниҳоди байналмилалӣ Аднон Абуҳасана мегӯяд, бо сабаби камбуди ғизо аҳолии ин борика бо шумули кӯдакон дар се рӯз як бор хӯрок мехӯранд. Ӯ таъкид кард, ки дар натиҷаи сиёсати қасдан гурусна нигоҳ доштани аҳолии Ғазза аз ҷониби Исроил, беш аз 66 ҳазор кӯдак бо суитағзияи шадид даст ба гиребон ҳастанд.
Дар ҳамин ҳол расонаҳо иттилоъ медиҳанд, ки артиши Исроил ҳамлаҳои ҳавоии худро ба шаҳрҳои Ғазза шиддат бахшидааст ва то рафт шумори кушташудагон ва захмиён дар ин борика бештар шуда, шароити кумакрасонӣ ва обу ғизо ба ҳадди ниҳоӣ мерасад.
Масъулони шаҳракаи Хон-Юнус дар Ғазза ба расонаҳо гуфтаанд, ки 700 ҳазор паноҳанда ва сокини ин шаҳракро ба сабаби норасоии кумакрасониҳо ва аз байн рафтани зерсохторҳои хатари марг таҳдид мекунад.
Ҳамчунин масъулони Вазорати беҳдошти Ғазза аз созмонҳои байналмилалӣ ва ҷомеаи ҷаҳонӣ талаб доранд, ки болои Исроил фишор оварда шавад, то гузаргоҳҳоро боз кунад ва ба вуруди кумкҳои инсониро иҷозат диҳад.
Мувофиқи оморҳои расмӣ аз 7-уми октябри соли 2023, замоне ки Исроил ҳамлаҳои худро болои Ғазза оғоз кард, то кунун 52 ҳазору 615 нафар ҷон бохта, 118 ҳазору 752 нафари дигар захмӣ шудаанд. Бар илова беш аз 10 ҳазори дигар зери овораҳо нопадид шудаанд.
Гуфта мешавад, Исроил рӯзи гузашта тарҳи ишғоли Ғаззаро низ тасвиб кард ва назари коршиносон, гуфтушуниде дар дар робита ба поён додани ҷанг дар роҳ нест. Ва ҳеч яке аз кишварҳои дунё ҳам ба ин тарҳи Бинёмин Натанёҳу вокуниши ҷиддие нишон надодааст.
Аммо гурӯҳи Ансоруллоҳ (Ҳусиҳо)-и Яман рӯзи якшанбеи гузашта дар пуштибони аз мардуми Ғазза бо мушаки баллистикӣ ба фурӯдгоҳи байналмилалии Бин-Гуриони Исроил ҳамла кард.
Расонаҳои Исроил аз манобеи амниятӣ ва низомӣ менависанд, ки системаҳои дифои ҳавоии амрикоии “THAAD” ва исраилии “Ҳейтс” кӯшиш карданд пеши роҳи мушакро бигиранд, вале ноком монданд.
Телевизиони 12-уми Исроил дар хабаре таъкид кард, ки мушаки Ҳусиҳо чор табақаи системаи дифои ҳавоиро убур карда, дар атрофи фурӯдгоҳ бархӯрд. Дар натиҷаи ин ҳамла 8 нафар захмӣ шудааст. Манобеи амниятии Исроил гуфтаанд, кӯлоҳаки мушак хеле бузург буд ва сабаби силсила таркишҳо шуда, ин зарбаи шадид чуқурии 25-метрӣ эҷод кард.
Пас аз ин ҳамла тамоми парвозҳо муваққатан лағв шуданд ва фаъолияти фурӯдгоҳ низ чанд соат боз мондааст. Дар ҳамин ҳол миллионҳо шаҳрванди он ба паноҳгоҳҳо паноҳ бурданд.
Расонаҳои исроилӣ хабар доданд, ки дар пайи ин ҳамла аксари кишварҳои аврупоӣ ва шарқӣ, аз ҷумла Олмон, Австрия, Ҳиндустон ва дигар кишварҳои дунё парвозҳои худро ба Телабиб муваққатан қатъ карданд.
