Муфтии Тоҷикистон Саидмукаррам Абдулқодирзода дар як фатвои ахираш гуфтааст, ки коргарони “Роғун” ба сабаби он ки корашон сахт аст, метавонанд рӯза нагиранд.
Абдулқодирзода дар суҳбат ба хабаргузории ҳукуматии “Ховар” гуфта, ки рӯза ибодати пурмашаққат аст ва “ниёз ба сабру таҳаммул дорад ва аз ин рӯ бархе аз афроди ҷомеа онро таҳаммул карда наметавонанд.” Ӯ афзуд, ки “… шариати исломӣ ба хотири осонӣ ва рафъи машаққат барои чунин гурӯҳи одамон хӯрдани рӯзаро рухсат додааст.”
“Шахсоне, ки кори аз ҳад пурмашаққатро анҷом медиҳанд, хусусан коргарони Неругоҳи барқи обии “Роғун”, ки дар айни ҳол дар нақбу иншооти рӯйизаминию зеризаминӣ машғули коранду масъулияти бузурги иҷрои корҳои сохтмонӣ доранд ва ҳолати гуруснагӣ ё ташнагии сахт хавфи зарар ба саломатиашон дорад, метавонанд дар рӯзҳои кории худ рӯза нагиранд ва дар вақти дигари барояшон муносиб ба рӯзҳои баробар ба он рӯзаи худро қазо бигиранд”,-гуфтааст Саидмукаррам Абдуқодирзода.
Ин фатвои Абдулқодирзода дар шабакаҳои иҷтимоӣ вокунишҳои тундеро ба бор овардааст. Аз ҷумла, чандин чеҳраҳои шинохта ва олимони дин ба Абдулқодирзода эрод гирифта, мегӯянд, ин фатвои ғалат аст ва муфтӣ масъаларо хуб дарк накардааст.
Ин бори аввал нест, ки фатвои хӯрдани рӯза барои коргарони “Роғун” аз забони муфтии Тоҷикистон Саидмукаррам Абдулқодирзода садо медиҳад. Ӯ солҳои гузашта низ ба ҳамин монанд фатвоҳо дода буд, ки аз тарафи донишмандони динӣ нодуруст шуморида шуд.
Баъзе мунтақидон мегӯянд, аз баски Абдулқодирзода ба доираҳои болоӣ ва хонадаи раисҷумҳур наздикӣ дорад, бидуни мурооти дониши динӣ талош мекунад бо фатвоҳояш раҳбарону мақомдорони кишварро розӣ кунад.
Ёдовар мешавем, ки фардо, 1-уми март аввали моҳи мубораки Рамазон фаро мерасад ва мусалмонони дунё, аз ҷумла Тоҷикистон аз фардо ба муддати як моҳ рӯза мегиранд.
