Рӯзи сешанбе 4-уми октябри соли 2022 Додгоҳи ноҳияи Шоҳмансури шаҳри Душанбе рӯзноманигори ҷавон Абдуллоҳи Ғурбатиро барои 7 солу 6 моҳ аз озодӣ маҳрум кард.
Ба гузориши расонаҳои кишвар, Додгоҳи ноҳияи Шоҳмансур имрӯз, 4-уми октябр мурофиаи додгоҳии Абдуллоҳ Ғурбатиро паси дарҳои баста бидуни ҳузури наздикону пайвандон ва рӯзноманигорон дар Боздоштгоҳи рақами яки шаҳри Душанбе (СИЗО) баргузор кард.
Ба иттилои Маркази мустақил оид ба ҳифзи ҳуқуқи инсон, Додгоҳ Абдуллоҳ Ғурбатиро бо моддаҳои 328 қисми 1, 330 қисми 1 ва 307 қисми 2 банди 3-и КҶ гунаҳкор ҳисобида, ба 7,5 соли зиндон ҳукм кард. Аммо худи Ғурбатӣ дар суханони охиронаш ҳама иттиҳомотро рад карда, гуноҳони эълоншуда алайҳи худашро эътироф накардааст.
Вакили дифои ин рӯзноманигор гуфта, ки аз болои ҳукми Додгоҳи ноҳияи Шоҳмансур ба зинаҳои болоӣ шикоят мебарад.
Ёдовар мешавем, ки дар ҷаласаи додгоҳии қаблии ин рӯзноманигори ҷавон айбдоркунандаи давлатӣ аз додрас хоста буд, ки ӯ ба 8 соли зиндони низомаш пурзӯр маҳкум шавад ва додрас ҳам ба хотири баррасии парванда ба хонаи машварат рафт ва қарор буд дирӯз, 3-уми октябр ҳукмашро эълон кунад, аммо ба имрӯз гузошта шуд.
Гуфта мешавад, мақомоти Тоҷикистон се моҳ пеш бо роҳандозии як иқдом алайҳи бархе фаъолони шабакаҳои иҷтимоӣ дар зарфи камтар аз як ҳафта журналист Абдуллоҳи Ғурбатиро ҳамроҳ бо Далери Имомалӣ, Завқибек Саидаминӣ ва Абдусаттор Пирмуҳаммадзода боздошт карданд. То ҳукми се рӯзноманигори дигар эълон нашудааст.
