Сарони кишварҳои Тоҷикистон ва Эрон ҳангоми мулоқоти худ дар Амрико дар бораи афзоиши парвозҳо байни ду кишвар гуфтугӯ карданд.
Бино ба иттилои расмӣ, 19-уми сентябри соли 2023 Эмомалӣ Раҳмон, Президенти Тоҷикистон ҳангоми мулоқот бо Иброҳим Раисӣ, Президенти Эрон “афзоиши парвозҳо байни ду кишвар ва содда гардонидани рафтуомади мардумони ду кишварро зарур шумурданд.”
Ба қавли манбаъ, президентҳои Тоҷикистон ва Эрон инчунин дар бораи “афзоиши таҳдиду хатарҳои муосир, аз қабили терроризм, ифротгароӣ, қочоқи маводи мухаддир, ҷиноятҳои муташаккили фаромиллӣ ва ҷиноятҳои киберӣ, ки ба вазъи амниятии кишварҳо мушкилоти ҷиддӣ эҷод менамояд”, гуфтугӯ карданд.
Аммо ҷониби Эрон расман дар бораи ин ҷузъият ва бахусус “афзоши парвозҳо байни ду кишвар ва содда кардани рафтуомад” чизе нагуфтааст, вале таъкид карда, ки сарони ду кишвар “бар тавсеаи ҳамкориҳои тиҷоратӣ ва иқтисодӣ ва ҳамчунин афзоиши таъомулоти Эрону Тоҷикистон дар созмонҳои байналмилалӣ таъкид карданд.”
Гуфта мешавад, раҳбарони Тоҷикистон ва Эрон зимни мулоқот дар бораи густариши таҳдиди хатарҳо аз хоки Афғонистон ба кишварҳои минтақа низ табодули назар карданд.
