Раиси Маҷлиси намояндагони Тоҷикистон Маҳмадтоҳир Зокирзода дар Анқара бо Раҷаб Тайиб Эрдуғон мулоқот кард.
Бино ба иттилои расонаҳои туркӣ, рӯзи 13-уми октябр ин дидор дар Қасри Президент, Қасри Чанкая дар Анқара 40 дақиқа давом кардааст. Аммо расонаҳои туркӣ аз ҷузъиёти ин вохурӣ чизе нашр накардаанд.
Ҳамзамон АМИТ “Ховар” гузориш дода, ки дар мулоқот масоили иқтисоду тиҷорат, нақлиёту энергетика ва дигар масоил баррасӣ шуд.
Зокирзода афзуда, ки Тоҷикистон кившари Туркияро шарики боэътимоди худ медонад. Инчунин вай дар ин мулоқот бо раисҷумҳури Туркия гуфта, ки ҳоло заминаи ҳуқуқии муносибатҳои Тоҷикистону Туркияро тақрибан 70 санади ҳамкорӣ ташкил медиҳанд.
Гуфтанист, “дар шаш моҳи аввали соли 2021 гардиши савдои хориҷии Ҷумҳурии Тоҷикистон бо Ҷумҳурии Туркия 186,6 млн доллари ИМА-ро ташкил дод, ки нисбат ба шашмоҳаи соли гузашта 27,6 млн. доллари ИМА зиёд гардидааст”.
Дар мулоқот таъкид шуда, ки дар оянда ба 1 миллиард доллар расонидани гардиши солона дар назар гирифта шудааст.
