Эътилофи зидди шиканҷаи Тоҷикистон бо нашри як гузориш гуфтааст, ки дар соли 2021 мақомоти Тоҷикистон даҳҳо нафар гумонбар ва пайвандони онҳоро мавриди шиканҷа қарор додаанд.
Дар ин гузориш Эътилофи зидди шиканҷаи Тоҷикистон исми 25 нафаре оварда шудааст, ки ба гуфтаи онҳо мақомоти корҳои дохилӣ ва амниятӣ дар вақти боздошт ва ё замони бозпурсӣ гумонбарон ва ё наздикону пайвандони онҳоро шиканҷа кардаанд.
Эътилофи зидди шиканҷа таъкид мекунад, ки наздик ба 30 нафар аз қурбониёни шиканҷа дар Тоҷикистон, ки ба ин ниҳоди ҷамъиятӣ шикоят кардаанд, миёнгини умри онҳо аз 22 то 60-сола мебошанд.
Ба қавли эътилоф, 21 нафар аз ин қурбониён аз мақомоти корҳои дихилӣ шикоят карда гуфтаанд: “Шиканҷа ва бадрафторӣ барои ба даст овардани эътирофи гуноҳ, ҷазо додани баъзе кирдорҳо ё ҳамчун чораи пешгирӣ ва паст задани шаъну эътибори шахсӣ истифода мешуд.”
Вазорати корҳои дохилии Тоҷикистон то кунун нисбат ба ин иддаъоҳои Эътилофи зидди шиканҷа вокунише накардааст, аммо тиқби қонунгузории кишвар ҳар навъ шиканҷа ва паст задани шаъну шарафи инсон ҳангоми бозпурсӣ ҷиноят дониста шуда, омилони шиканҷаро то 15 соли зиндон таҳдид мекунад.
