Шоми 25-уми майи соли ҷорӣ, афсарони “Алфа”-и Кумитаи давлатии амнияти миллии Тоҷикистон ва “ОМОН” дар чанд “КамАЗ” ва мошинҳои боркаш вориди маҳаллаи Бархоруғ шуда, дар “Пастчид” ва тарабхонаи “Лаззат” ҷойгир шуданд.
Pamir Daily News, ки бештар ахбори Вилояти Мухтори Кӯҳистони Бадахшонро пӯшиш медиҳад, дар истинод ба манбааш хабар дод, ки афсарон ба сӯи сокинони маҳаллӣ, ки кӯшиши боздоштани онҳоро кардаанд, оташ кушодаанд.
Гуфта мешавад, ин афсарон нафареро бо насаби Носиралиев ҷустуҷӯ доранд. Онҳо сокинони маҳаллиро таҳдид кардаанд, ки агар ин шахс берун набарояд, хона ба хона гашта ӯро пайдо мекунанд ва Бархоруғро ба шакли васеъ “поккорӣ” хоҳанд кард.
Дар ҳамин ҳол манбаъ аз зиёд шудани нерӯ ва техникаи низомӣ дар шаҳри Хоруғ хабар дод. Инчунин гуфта мешавад, ки талоши баргузории амалиёти вижаи нерӯҳои давлатӣ алайҳи раҳбарони дигари ғайрирасмӣ пас аз қатли Мамадбоқир Мамадбоқиров аз эҳтимол дур нест.
Ба Azda.tv то ҳол муаяссар нашудааст, ки хабарро аз манобеи дигар тасдиқ кунад. Дар ҳоли дастрасӣ ба иттилои тозае хабар такмил мешавад.
