Мақомоти омори Толибон мегӯянд, ки теъдоди нуфуси сокинони Афғонистон ба 36 миллион нарафар наздик мешавад.
Бино ба иттилои расонаҳои Афғонистон, 7-уми августи соли 2024, Исматуллоҳ Ҳакимӣ, муовини идораи миллии омори Афғонистон дар ҳукумати Толибон ба расонаҳо гуфтааст, ки теъдоди сокинони ин кишвар ба 35 миллиону 800 ҳазор нафар расидааст.
Ба қавли манбаъ, аз ин ҳисоб, 1,5 миллон нафар сокинони ин кишварро кӯчиҳо ташкил медиҳанд, 9,2 миллион нафар ҳам дар шаҳрҳо зиндагӣ мекунанд ва боқӣ 25 миллион нафари дигар деҳнишин буда, дар рустоҳо зиндагӣ мекунанд.
Исматуллоҳ Ҳакимӣ, муовини идораи миллии омори Афғонистон, ки дар бораи кори як соли ахири ин ниҳод гузориш медод, гуфтааст, ки “аз ин теъдод 18,2 миллион нафар мард ва боқӣ 17,6 миллион нафар ҳам зан мебошанд.
Толибон, ки Афғонистон зери парчами Иморати исломӣ фаъолиятҳои худро идома медиҳанд, баъд аз 20 соли ҷанг бо нерӯҳои хориҷӣ таҳти раҳбарии Амрико ва НАТОН 15-уми августи соли 2021 дубора дар Афғонистон ба қудрат расиданд. Бо гузашти се сол ҳеч кишваре дар дунё ҳукумати онҳоро ба расмият нашинохтааст. Аммо тамоми кишварҳои ҳамсояи Афғонистон ва аз ҷумла ҳукумати Эмомалӣ Раҳмон дар Тоҷикистон бо онҳо робитаҳои дипломатӣ, сиёсӣ ва тиҷоратии густурдае барқарор кардаанд.
