Cозмони ҳуқуқии “Афви Байналмилал” (Amnesty International) аз кишварҳои ҷаҳон даъват кард, ки паноҳҷӯёни зодагони Бадахшонро ба Тоҷикистону Русия истирдод накунанд.
Дар изҳороте, ки ин созмон рӯзи 21-уми сентябри соли ҷорӣ нашр кардааст, гуфта мешавад, ки бисёре аз паноҳҷӯёни помирӣ дар баъзе аз кишварҳои Аврупо ва ҷойҳои дигар зери хатари ихроҷ қарор доранд ва дар сурати ихроҷ шудани онҳо ин кишварҳо пояи асосии ҳуқуқи башар ва қонуни паноҳандагонро вайрон мекунанд.
Ба гуфтаи ин созмон, қонуни паноҳандагон фиристодани шахсро ба ҷое, ки метавонад ба таъқиб ё нақзи ҷиддии ҳуқуқи башар дучор шавад, манъ мекунад ва помириҳое, ки ба Русияву Тоҷикистон ихроҷ мешаванд, ба боздошту шиканҷа ва зиндон ё нопадид шудан рӯ ба рӯ хоҳанд шуд.
Дар идома “Amnesty International” аз ҷомеаи ҷаҳонӣ хостааст, ки вазъи ҳуқуқи одамонро дар Тоҷикистон, аз ҷумла Вилояти Мухтори Кӯҳистони Бадахшон, назорат карда, дар ҷаласаҳои байнулмилалӣ ва минтақавӣ дар миён гузоранд ва ба ҳалли он талош кунанд.
Ин созмони байналмилалӣ мегӯяд, ки табъизи густурда алайҳи помириҳо бояд мустақилона ва аз рӯйи инсоф таҳқиқ карда шавад ва зодагони Бадахшон аз ҳуқуқи иқтисодӣ, иҷтимоӣ ва шаҳрвандиву сиёсии худ пурра истифода кунанд.
Инчунин дар изҳороти ин созмон гуфта шудааст, ки мақомоти Тоҷикистон аз моҳи майи соли 2022 саркӯби худро алайҳи помириҳо афзоиш дода, худсарона беш аз 200 сокини ин минтақаро, аз ҷумла фаъолони ҷомеаи шаҳрвандӣ ва ҳомиёни ҳуқуқи башарро боздошт карда, бо иттиҳомоти сохта ба зиндон андохтанд.
Ҳамзамон созмони “Афви Байнулмилал” бо чанд шоҳиди ҳодисаҳои моҳи майи 2022 дар ВМКБ суҳбат кардааст, ки аз ҷониби мақомоти тоҷик бозпурсӣ шудаанд.
Гуфта мешавад, маҳз пас аз ин ҳодисаҳо садҳо нафар аз зодагони Вилояти Мухтори Кӯҳистони Бадахшон маҷбур шуданд Тоҷикистону Русияро тарк намуда, ба кишварҳои Аврупоӣ паноҳ баранд.
Шоҳидони ҳодисаҳои охири Бадахшон, ки ҳоло дар хориҷ аз кишвар қарор доранд гуфтаанд, ки ҳангоми бозпурсӣ натанҳо нисбат ба худ, балки дар ҳаққи модару хоҳару ҳамсарашон дашном шунида, бо мушту калтаку барқ шиканҷа шуданд.
Ин созмон аз мақомоти Тоҷикистон хоастааст, ки ҳама гуна шикоят дар бораи бадрафторӣ нисбат ба боздоштшудаҳо бояд дақиқан таҳқиқ ва гумонбарон ба ҷавобгарӣ кашида шаванд.
Cозмони ҳуқуқии “Афви Байналмилал” ҳамзамон аз ҳукумати Тоҷикистон хостааст, ки интиқомгириро аз фаъолони помирӣ ва норозиёну мухолифони дигар бас карда, вакилону рӯзноманигорон ва пешвоёни ҷомеаи бадахшониҳоро бешарту қайде аз ҳабс озод кунад.
