Эҳтимол меравад дар ояндаи наздик Иёлоти Муттаҳидаи Амрико алайҳи Ҷумҳурии Қирғизистон таҳримҳои иқтисодӣ ҷорӣ кунад.
Рӯзномаи “The Washington Post” 18-уми июли соли ҷорӣ бо нашри матлабе навишт, ки истихбороти Амрико аз вуҷуди ҳапоаймоҳои бесарнишини чинӣ дар Русия хабар дод. Ба иттилои манбаъ, маъмурияти раисиҷумҳури Амрико Ҷо Байден аз он нигаронанд, ки ҳавопаймоҳои бесарнишини чинӣ тариқи Қирғизистон ба Русия интиқол ёфтаанд.
Ин рӯзномаи амрикоӣ менависад, ки пас аз ҳамлаи Кремл ба Украина ва хусусан дар моҳҳои охир Қирғизистон ба таври чашмгир ширкатҳои воридотӣ ва содиротии худро тавсеа дода, ки асосан бо Русия тиҷорат мекунанд. “Washington Post” бо такя ба як манбааш аз мақомҳои баландпояи амрикоӣ менависад, ки “ин ширкатҳо аз фурӯши афзояндаи молҳои таҳримшудаи чинӣ ва аврупоӣ – аз паҳподҳои интиҳорӣ ва қисмҳои ҳавопаймоҳо то тирҳои туфангча ва системаи пешрафтаи бомба – фоида ба даст меоранд, ки аксари онҳо тавассути ҳавопаймо ба ширкатҳои Русия интиқол дода мешаванд.”
Ба иттилои манбаъ, Амрико метавонад дар посух ба эҳтимоли интиқоли таҷҳизоти технологӣ ва низомӣ ба Русия дар давоми ин ҳафта алайҳи Қирғизистон таҳримҳои иқтисодӣ эълон кунад.
Гуфта мешавад, маъмурияти раисиҷумҳури Амрико пас аз боздидҳои чанд моҳи ахири дипломатҳои амрикоӣ ва аврупоӣ аз Бишкек ва бенатиҷа анҷом ёфтани гуфтугӯҳо, ба таҳияи таҳримҳо шурӯъ кардааст.
Ҳоло мушаххас нест, ки Қирғизистон маҳз бо чӣ навъи таҳримҳо рӯбарӯ мешавад, аммо манбаи ин рӯзномаи амрикоӣ мегӯяд, ки Вошингтон қаблан алайҳи ширкатҳои қирғизӣ таҳрим ҷорӣ намуда, бахусус онҳоро ба рӯйхати сиёҳ ворид карда буд.
