Расонаҳо бо истинод аз мақомоҳои баландпоияи амрикоӣ гузориш доданд, ки Доналд Трамп ирсоли ҳамагуна кумакҳои низомиро ба Украина боз доштааст.
Бар асоси ин гузориш ва ба нақл аз як мақоми Пентагон, интиқоли таҷҳизоти низомии Амрико, ки феълан дар Украина нест, аз ҷумла силоҳҳое, ки дар роҳи интиқол аз тариқи ҳавопаймоҳо ва киштиҳо ҳастанд ва ё мунтазири ирсоли онҳо дар манотиқи транзитӣ дар Лаҳистон қарор доранд, билофосила қатъ карда мешавад.
Расонаи амрикоии Bloomberg менависад, манъи ирсоли кумакҳои низомии аз ҷониби Трамп то замоне идома хоҳад дошт, ки тарафи Украина барои суҳл бо Русия омода бошад.
Ёдовар мешавем, ки 28-уми феврали соли ҷорӣ дар дохили Кохи Сафед дар Вашингтон мулоқоти Владимир Зеленский, раисҷумҳури Украина бо президенти Амрико Доналд Трамп баргузор гардид ва интизор мерафт, ки дар ҷараёни ин мулоқот созишнома дар бораи истихроҷи маъданҳои Украина ба имзо расад.
Аммо ин мулоқот бо раддубадалҳои доғ дар Кохи Сафед байни Зеленский, Доналд Трамп ва Венс анҷомид ва раисҷумҳури Украина маҷбур шуд Вашингтонро тарк кунад.
Як рӯз пас аз раддубадалҳои сахт миёни президентҳои Украина ва ИМА, Владимир Зеленский ба Лондон сафар кард. Ӯ барои иштирок дар нишасти сарони кишварҳои Аврупо, ки бо мизбонии сарвазири Бритониёи Кабир Кир Стармер баргузор шуд, сафар кард.
Яке аз мавзуҳои нишасти Лондон фишори бештар болои Русия буд ва ба мувофиқа расиданд, ки кумаки низомӣ ба Украинаро идома медиҳанд ва фишору таҳримро болои Русияро бештар мекунанд.
