Амрико қасд дорад дороиҳои “олигархҳо”-и русро, ки дар оғози лашкаркашии Русия ба Украина дар кишвараш боздошта буд, барои рафъи мушкилоти иқтисодӣ ба Киев бисупорад.
Кохи сафед рӯзи панҷшанбе пешниҳод кард, ки бо ҳадафи ҷуброни хасороте, ки Русия ба Украина ворид кардааст, истифода аз дороиҳои боздошташудаи сарватмандони наздик ба Путин, ки ҳоло дар дасти Амрико қарор доранд, ба Киев таҳвил дода шавад.
Давлати Ҷо Байден мегӯяд, интиқоли дороиҳои “дуздсолорон” ба Киев хасоротеро, ки Русия ба Украина ворид кардааст, ҷуброн мекунад.
Аммо маълум нест, ин пешниҳод пазируфта хоҳад шуд ва ё не, аммо аз ин пеш ҳам чунин сару садоҳе дар расонаҳо ба нашр мерасид, ки Амрико қасди истифода аз дороиҳои сарватмандони наздик ба Путинро ба нафъи Украина дорад.
