Амруллоҳ Солеҳ, собиқ муовини аввали раисҷумҳури Афғонистон гуфтааст, ки омодааст Толибонро бипазирад, вале бо шарти ин ки дар кишвараш барои қабули онҳо ҳамапурсӣ гузаронида шавад.
Собиқ муовини раисҷумҳури Афғонистон, Амруллоҳ Солеҳ дар мусоҳибае бо шабакаи ВВС иддао карда, ки агар Толибон баргузории ҳамапурсиро бипазирад, машруъияташро мепазирад ва омодаи поён додан ба муқовимати мусаллаҳона аст.
Оқои Солеҳ дар ин мусоҳиба гуфт:
“Мо омодаи поён додан ба муқовимати мусаллаҳона ҳастем, ба шарти ин ки меконизме барои як референдом эҷод шавад. Агар Толибон баранда шуд, мусалламан мо машруъияти онҳоро мепазирем. Аммо ба гурӯҳе, ки аз масири тавтиа ба қудрат расидааст, таслим нахоҳем шуд.”
Аммо то ҳол вокунеши расмие аз ҷониби Толибон ба гуфтаҳои оқои Амруллоҳ Солеҳ нашудааст.
Пас аз шикасти ҳукумати Ашраф Ғанӣ дар 15-уми августи соли 2021 ва сари қудрат омодани Толибон, аксар чеҳраҳои сиёсии Афғонистон ба хориҷ аз Афғонистон фирор карданд. Аммо, гуфта мешавад, Амруллоҳ Солеҳ дар аввал ба Панҷшер рафт ва дар онҷо бо Аҳмад Масъуд Ҷабҳаи муқовимати миллии Афғонистонро ташкил кард, вале аз суқути Панҷшер ба дасти Толибон ба Тоҷикистон паноҳ бурд.
