Дар пайи ҳамлаҳои ҳавоӣ ва мушакии Исроил ба шимоли Лубнон наздики 500 нафар кушта шуда, ҳудуди 1650 нафари дигар захмӣ шудаанд.
Вазорати беҳдошти Лубнон шоми рӯзи 23-уми сентябр гузориш дод, ки дар пайи ҳамлаҳои рӯзи душанбеи артиши Исроил ба минтақаҳои шимолии Лубнон 496 нафар ҷон бохтанд, ки дар байни кушташудагон даҳҳо зан ва 35 кӯдаки ноболиғ будаанд.
Мақомоти лубнонӣ гуфтаанд, ҳамлаи рӯзи душанбе маргбортарин ҳамла буда, давоми 30 соли ахир дар торихи Лубнон болотарин теъдоди талафоти ҷониро дар як рӯз доштааст.
Ин вазоратхона мегӯяд, ки ҳамчунин аз тарси ҷон даҳҳо ҳазор аз сокинони минтақаҳои бомбороншуда барои ҷои амн пайдо кардан хонаҳои худро тарк кардаанд.
Аз оғози ҷанги Исроил бо ҲАМОС наздики як сол мегузарад ва инак Исроил таваҷҷуҳи худро ба марзи шимолии худ бо Лубнон нигаронида, бо гурӯҳи “Ҳизбуллоҳ” ҷангро оғоз карданист.
Вазорати дифои Исроил эълон кард, ки аз рӯзи панҷшанбеи гузашта то имрӯз 1600 мақар ва пойгоҳи мутааллиқ ба гурӯҳи “Ҳизбуллоҳ”-ро мавриди ҳадаф қарор додааст. Ва ҳадафи ин ҳамлаҳои ҳавоиро Исроил “амалиёти пешгирона, тазъифи “Ҳизбуллоҳ” ва бозгардонидани аҳолии шимол ба хонаҳояшон” унвон мекунад.
Аммо ба гузориши расонаҳои маҳаллӣ, минтақаҳои бомбороншуда танҳо пойгоҳҳои “Ҳизбуллоҳ” набуда, балки баъзе бемористонҳо ва хонаҳои маскунӣ бомборон шудаанд.
Дар ҳамин ҳол гурӯҳи “Ҳизбуллоҳ” низ иттилоъ дода, ки ба ҳамлаҳои Исроил посух дода, ба чанд нуқтаҳои стратегӣ, аз ҷумла фурӯдгоҳи низомии Маҷду ва чанд пойгоҳӣ дигари Исроилро мавриди ҳадаф қарор додааст.
Ёдовар мешавем, ки рӯзи 18-уми сентябр дар як ҳамлаи киберӣ наздики 5 ҳазор дастгоҳи “Пейҷер” дар бадани лубнониҳо таркид, ки гуфта мешавад, аксари кушташудаҳо ва захмиён аъзои гурӯҳи “Ҳизбуллош” буданд. Пас аз ин ҳамла, вазири дифои Исроил Юоф Галант дар изҳороте гуфт, ки “Акнун ҷанг ба марҳилаи нав ворид шуд ва таваҷҷуҳ ба сӯи шимол мешавад.” Баъди ин изҳорот ҳамлаҳои ҳавоии Исроил ба Лубнон шиддат гирифтааст.
