Рӯзи гузашта ду писарбачаи ноболиғ дар Вилояти Мухтори Кӯҳистони Бадахшон ҳангоми бозӣ ба дарё афтода, ғарқ шуданд.
Кумитаи ҳолатҳои фавқулодда ва мудофеаи граждании Тоҷикистон хабар дод, ки асри рӯзи 4 июли соли ҷорӣ ду писарбачаи ноболиғ, ки яке 14 сол ва дигарӣ 12 сол доштаанд, ҳангоми бозии футбол тӯпашон ба дарё меафтад. Ин ду писарбача барои гирифтани тӯп худро ба дарё меандозанд ва талош мекунанд онро бигиранд, аммо худашон ғарқ мешаванд.
Тибқи иттилои КҲФ, писарбачаи 14-сола сокини деҳаи Вамари ҷамоати деҳоти Рӯшон буда ва писарбачаи 12-сола меҳмон аз шаҳри Хуҷанди вилояти Суғд будааст.
Гуфта мешавад, барои ёфтани ҷасади ноболиғон гурӯҳи наҷоти Раёсати Кумитаи ҳолатҳои фавқулодда дар ВМКБ ба ҷойи ҳодиса рафтанд, вале то ҳол ҷасадҳоро пайдо накардаанд. Кумита мегӯяд, аз субҳи имрӯз низ корҳои ҷустуҷӯиро аз сар гирифтаанд.
