Тоҷикистон як сокини ноҳияи Шаҳритӯсро, ки аз Австрия истирдод шуда буд, ба 15 соли зиндони низомаш сахт маҳкум кард.
Дар ин бора “Asia-Plus” дар истинод ба ёрдамчии калони додситони вилояти Хатлон Варқа Зайниддин хабар медиҳад.
Бино ба навиштаи манбаъ, Додгоҳи ноҳияи Шаҳритӯс Фаррух Зоирови 30-соларо барои кӯшиши пайвастан ба ташкилоти террористии “Давлати исломӣ” ва иштирок дар ҷангҳои Сурия бо қисми 3 моддаи 32 (Тайёрӣ ба ҷиноят, сӯиқасди ҷиноят) ва моддаи 401(1) (ҷалб ва иштирок дар ҷангҳо дар ҳудуди давлатҳои дигар)-и Кодекси ҷиноятӣ гунаҳкор донистааст.
Ба иддаои мақомот, Фаррух соли 2014 дар муҳоҷирати корӣ дар шаҳри Маскав қарор дошта, бо нафаре бо номи Ҳусейн Содиқов, узви ДИИШ якҷо зиндагӣ мекардааст. Гӯё Содиқов ба ӯ тавсия додааст, ки барои иштирок дар ҷангҳо ба Сурия тавассути Туркия равад. Аммо ҳангоми убури марз, Фаррухро мақомоти Туркия дастгир ва аз кишвар хориҷ карданд.
Баъди ин Фаррух Зоиров аввал ба Украина ва сипас ба Австрия меравад ва октябри соли 2024, мақомоти Австрия ӯро барои вайрон кардани қонунҳои муҳоҷират ба Тоҷикистон истирдод карданд.
Худи Ҳусейн Содиқов қаблан дастгир шуда, моҳи майи соли 2017 дар Тоҷикистон ба 18 соли зиндон маҳкум гардидааст.
То ҳол назари Фаррух Зоиров ва пайвандону вакили дифоаш дар бораи иттиҳоми мақомот дастрас нест.
Пештар аз ин расонаҳо аз 14 сол ҳукми зиндони Алишер Махсудови 22-сола хабар дода буданд. Гуфта мешуд, мақомот бо ваъдаи бахшиши гуноҳ аз хориҷи кишвар ӯро даъват намуданд, вале баъдтар бо се моддаи Кодекси ҷиноӣ айбдор ва равонаи зиндонаш карданд.
Мақомот ин ҷавони тоҷикро низ ба гуноҳи ширкат дар ҷанги Сурия ва узвият дар созмони мамнуи “Салафият” айбдор кардаанд.
Пайвандонаш иттиҳоми мақомотро рад карда, мегӯянд, ки Алишер ҳеҷ гоҳ ба Сурия нарафатааст ва солеро, ки мақомот чун дар Сурия будани ӯ ишора кардаанд, дар Тоҷикистон зистааст.
Ба гуфтаи пайвандонаш, Махсудов дар ибтидо ба Русия рафта, аз он ҷо соли 2021 ба Лаҳистон, баъдан ба Олмон рафт. Вақте дархости паноҳандагиаш пазируфта нашуд, ба Тоҷикистон баргашт ва аз он ҷо боз ба Русия рафта, ба Тошканд сафар кардааст. Мақомот ӯро бо ваъдаи афв фиреб дода, ба Тоҷикистон бурданд ва зиндонӣ кардаанд.
