Иттиҳоди Аврупо иддао дорад, ки барои таҳқиқи таҷовузҳои Русия дар Украина як додгоҳи ҷудогона бо пуштибонии Созмони Миллал ташкил карда шавад.
Раиси Комиссияи Аврупо Урсула фон дер Ляйен рӯзи чоршанбе пешниҳод кард, ки парвандаи қатлу таҷовузҳои Русия дар Украинаро бояд як додгоҳи махсус аз ҷониби Созмони Миллали Муттаҳид таҳқиқи ҳамаҷониба кунад.
Раиси Комиссияи Аврупо дар як изҳороти видеоӣ гуфт: “Дар баробари идомаи дастгирии Додгоҳи Байналмилалии Ҷиноӣ, мо пешниҳод мекунем, ки як додгоҳи махсусгардонидашуда бо пуштибонии Созмони Милали Муттаҳид барои таҳқиқ ва таъқиби ҷиноятҳои таҷовузкоронаи Русия таъсис дода шавад”.
“Мо омодаем, ки бо ҷомеаи ҷаҳонӣ ҳамкорӣ кунем, топуштибонии васеътари байналмилалиро барои ин додгоҳи тахассусӣ ба даст орем”, – мегӯяд Фон дер Ляйен.
Ин дар ҳолест, ки Киев борҳо аз муттаҳидони ғарбии худ даъват карда буд, ки додгоҳи байналмилалие таъсис диҳанд, то мақомоти Русия ва сарбозоне, ки дақиқ шудааст, дар Украина ба ҷиноёти ҷангӣ даст задаанд, муҳокима кунанд.
Бо идома ёфтани ҷанги Русия дар Украина мавқеи Ғарб дар қиболи Маскав то рафт шадидтар мешавад. Ҳафтаи гузашта порлумони Аврупо қатъномаеро қабул кард, ки Русияро давлати ҳомии терроризм эълон кард. Кремл қаблан ҳама иттиҳомот дар бораи ҷиноятҳои эҳтимолии сарбозони рус дар Украинаро рад карда буд.
