Хабари сабтином ва истифодаи воксинаи зидди коронавирус дар бадани инсонро Владамир Путин, раиси ФР 11 август дар ҷараёни нишасти аъзои ҳукумати кишвараш, ки телевизионҳо мустақим пахш карданд, эълом кард.
Хабаргузории “Лента.ру” менависад, аввалин ваксинаи сабтиномшуда дар Русия аз ҳоло бехатарӣ ва самарбахшии худро нишон додааст.
Владимир Путин раиси ҷумҳури Русия гуфт, ваксинаи коронавирус аз тамоми ташхисҳои лозима гузаштааст.
“Субҳи имрӯз (11 август) бори нахуст дар ҷаҳон ваксинаи коронавирус сабти ном шуд.Медонам, ки ваксинаи мазкур самарабахш аст, маснуияти баданро ҳосил мекунад”, – гуфт Владимир Путин.
Путин ба коршиносон барои кори фаврӣ ва пурмасъул дар коркарди ваксинаи зидди коронавирус изҳори сипос кард. Ӯ изҳори умедворӣ намуд, ки ба наздикӣ ваксини мазкур дар ҳаҷми зиёд истеҳсол ва ба аҳолӣ дастрас мешавад.
Вазири тандурустии кишвар Михаил Мурашко таъйид намуд, ки нахустин ваксини дар Русия сабтиномшуда аллакай самаранокӣ ва бехатарии худро исбот кардааст.
Вай афзуд, ки ваксина дар як вақт дар ду замина истеҳсол хоҳад шуд. Коршиносони рус аллакай дар баҳори гузашта ба коркарди ваксини зидди коронавирус шурӯъ карданд. Маводро миёнаҳои июн дар бадани чанд довталаб аз озмоиш гузарониданд.
Пизишкон таъкид намуданд, ки ҳамагуна асари ваксин ба саломатӣ хатаре надорад ва пас аз як рӯз мегузарад. Зиёда аз ин, дар натиҷаи озмоиш муайян гардид, ки ваксина ба бадани инсон кумак мекунад, ки зидди коронавирус масуният коркард кунад.
Хабари иҷозаи истифодаи ваксинаи зидди коронавирус дар Русия дар ҳоле расонаӣ мешавад, ки шумори қурбониёни ин беморӣ дар ин кишвар бештар мешавад ва ҷаҳон аз хатари эҳтимолии мавҷи дуввуми он дар изтироб аст.
То имрӯз омори каронавирус нишон медиҳад, ки дар ҷаҳон шумори гирифторони ин беморӣ марзи 20 млнро убур кард, аммо адади вафотёфтагон беш аз 741 ҳазор гуфта мешавад.
