Бо дастури ҳукумати Тоҷикистон дар ҷумҳурӣ рӯзи 10 декабри соли равон Ситоди ягонаи ҷумҳуриявӣ оид ба назорати истифодаи сарфакоронаи нерӯи барқ ва ошкор намудани ҳолатҳои пайвастшавии ғайриқонунӣ ба шабакаҳои барқӣ таъсис дода шуд. Дар ин бора сомонаи расмии ВКД хабар дод.
Ба навиштаи ин сомона таҳти роҳбарии Вазири корҳои дохилӣ Раҳимзода Рамазон ҷаласаи якҷояи намояндагони сохторҳои Вазорати корҳои дохилӣ, Кумитаи давлатии амнияти миллӣ, Прокуратураи генералӣ, Агентии назорати молиявӣ ва мубориза бо коррупсия, Кумитаҳои кор бо ҷавонон ва варзиш, кор бо занон ва оилаи назди Ҳукумати Ҷумҳурии Тоҷикистон, ҳамчунин намояндагони Вазорати энергетика ва ШСХК «Барқи Тоҷик» доир гардид.
Дар ин ҷаласа оиди бардоштани маҳдудияти истифодаи нерӯи барқ аз 10 декабри соли равон дар ҳудуди ҷумҳурӣ ва аз зарурати назорати сарфакорона истифода намудани қувваи барқ аз ҷониби шаҳрвандон дар давраи зимистон гуфта шудааст.
Ин ситод аз 10 декабр фаъолияти худро оғоз намуда, вазифаи он дар ҳар як шаҳру навоҳӣ гузаронидани корҳои фаҳмондадиҳӣ оид ба истифодаи сарфакоронаи барқ миёни аҳолӣ ва ошкор намудани ҳолатҳои тасарруфи ғайриқонунии нерӯи барқ аст.
Ба навиштаи сомонаи ВКД ҳар як шаҳрванд, корхонаю ташкилотҳо новобаста аз шакли моликияташон аз ҷониби гурӯҳҳои корӣ санҷида мешаванд, ки чӣ гуна барқро истифода мебаранд.
Дар идома аз тамоми шаҳрвандон хоҳиш карда шудааст, ки дар давраи зимистон барқро сарфакорона истифода намуда, масъулияти баланди шаҳрвандии хешро нишон диҳанд.
