Мақомоти расмии Тоҷикистон ва Қирғизистон барои муайян кардани хати марз дар минтақаҳои ҳассоси байни ду кишвар омода мешаванд.
Бино ба иттилои расмӣ, Рӯзҳои 11-ум то 17-уми августи соли ҷорӣ ҳайатҳои ҳукуматии Тоҷикистону Қирғизистон дар мавриди таъйин ва аломатгузории марзи давлатӣ мулоқот карданд.
Ба қавли манбаъ, ин мулоқот дар шаҳри Ботканди Қирғизистон баргузор шуда, ҷонибҳо аз ҷузъиёти он тақрибан чизе нагуфтаанд.
Кумитаи давлатии амнияти миллии Тоҷикистон дар иттилоияе гуфтааст, ки ҷонибҳо дар бораи минтақаҳои боқимондаи марз суҳбат карда, барои аниқ кардани ин қитъаҳои сарҳад боз вомехӯранд.
Гуфта мешавад, аз 987 км марзи Тоҷикистону Қирғизистон 94 дарсади он муайян шуда, ду тараф барои шаш дарсади дигар ба тавофуқ нарасидаанд.
Бино ба иттилои мақомоти Қирғизистон нуқтаҳое, ки то ҳол аниқ нашудааст дар минтақаҳои марзии вилояти Ботканд ва Суғди Тоҷикистон, ҷойе ки дар гузашта боиси баҳсу ҷанҷолҳои зиёд шуда буд, ҷойгир аст.
Ин дар ҳолест, ки дар аввали соли ҷорӣ гуфта мешуд, баҳсҳои марзии Тоҷикистону Қирғизистон ба эҳтимоли зиёд то моҳи марти ҳамин сол ба поён мерасад, вале дида мешавад, ки то ҳанӯз ин масъала ҳали ниҳоии худро наёфтааст.
