Ҳамкорон ва шогирдони Иззат Амон, ки то боздошти ӯ дар “Маркази тоҷикон” дар Русия ҳамроҳаш кор мекарданд, аз таъқибу бозпурсӣ шудани хонаводаҳояшон аз ҷониби мақомоти интизомии кишвар хабар доданд.
Бахтовар Ҷумъаев, ҳомии ҳуқуқи муҳоҷирони дар Русия ва яке аз онҳо, ки дар “Маркази тоҷикон” ҳамроҳи Иззат Амон кор кардааст мегӯяд, мақомоти Тоҷикистон болои хонаводааш фишор овардаанд, ки ӯ ба кишвар баргардад.
Ба навиштаи Радиои Озодӣ маъмурони Раёсати мубориза бо ҷиноятҳои муташаккили Вазорати корҳои дохилии Тоҷикистон (УБОП) рӯзи 11 май падарашро аз Панҷакент даъват намуда як рӯз дар Боздоштгоҳи муваққатӣ нигоҳ доштаанд ва ҳамчунин ҳамсари ӯро, ки дар Душанбе донишҷӯ будааст низ даъват намуда, талаб кардаанд, ки Бахтовар ба ватан баргардад.
Ҷумъаев мегӯяд, баъд аз боздошт ва истирдоди Иззат Амон ба Душанбе баъзе манбаъҳо ба ӯ иттилоъ додаанд, то рӯзи 1 май ӯро ҳам ба Тоҷикистон истирдод мекунанд ва аз ин рӯ аз қаламрави Русия берун шудааст:
“Ҳоло андаке вазъият беҳбуд ёбад, боз ба Маскав бармегардам”-, гуфт ӯ.
Ҳамчунин дар қатори Бахтовар ҳамкорони дигари Иззат Амон низ аз таъқибу фишори мақомот хабар додаанд. Суҳроби Ҷаҳон, яке аз ҳомиёни ҳуқуқи “Маркази тоҷикон” гуфта, ки маъмурони Раёсати мубориза бо ҷиноятҳои муташаккили Вазорати корҳои дохилии Тоҷикистон пайвандони ӯро низ даъват намуда, забонхат гирифтаанд. Ӯ ба Радиои Озодӣ гуфт:
“кормандони мақомот аз наздикони ман забонхат гирифтаанд. Гуфтаанд, ки агар хонданӣ рафта бошад, ба таҳсилаш машғул шавад дар шабакаҳо суратҳое, ки ҳамроҳи Иззат Амон гузоштааст, нест кунад. Дар як навори видеоӣ аз Бобои Дона аз хиёнаткорҳо ҳимоят кардааст, кур карда партояд”.
Иззат Амон ҳомии ҳуқуқи муҳоҷирон дар Русия моҳи марти соли ҷорӣ бо дархости Тоҷикистон аз ҷониби мақомоти қудратии ин кишвар боздошт ва шаҳрвандияш бекор карда шуда ба Душанбе истирдод шуд. Вазорати корҳои дохилии Тоҷикистон расидан баробар ӯро бо иттиҳоми қаллобӣ айбдор кард ва ба ҳабси пешакӣ гирифт.
Муҳоҷирони тоҷик дар шаҳри Маскав барои озодии ӯ даст ба эътироз заданд ва дар назди сафорати Тоҷикистон талаби озодии Иззат Амонро карданд. Дере нагузашт, ки тақрибан ҳамаи муҳоҷирон боздошт шуданд, ки бо кумаки созмонҳои ҳуқуқӣ ва дахолати мухолифон озод карда шуданд.
Ҳамчунин дар баробари ин бо ибтикори КДАМ-и Тоҷикистон тақрибан ҳаррӯз донишҷӯён, омӯзгорон ва сокиноне, ки Иззатро умуман намешинохтанд дар назди дурбин ӯро ба қаллобӣ айбдор мекарданд.
