Дар Тоҷикистон арзиши тамосҳои мобилӣ ва SMS-паёмакҳо то 60 дарсад гарон мешавад. Хадамоти алоқаи Тоҷикистон хидматрасонии паёмакҳои кӯтоҳи мобилиро дар кишвар дар ихтиёри ширкати оффшории IRS, ки моликонаш расман маълум нестанд, вале гуфта мешавад, аз наздикони раисҷумҳур Раҳмон ҳастанд, қарор дод. Дар ин бора “Азия-Плюс” бо такя ба манобеаш хабар медиҳад.
Тибқи ин хабар, аз ин ба баъд маблағи SMS-паёмакҳое, ки бештар таксиву бонкҳо, онлайн-хизматрасониҳо, букмекерҳо ва дигар ташкилоту ширкатҳо онро тариқи SMPP-шлюзҳои операторони мобилӣ ба муштариёни худ ирсол мекунанд, ба ҳисоби ширкати оффшории IRS ворез мешаванд.
Гуфта мешавад, акнун шарикони операторони мобилии Тоҷикистонро зарур аст, ки бо ширкати оффшории IRS шартнома имзо кунанд.
“Дар натиҷаи монополия кардани бозор SMS-паёмакҳо тибқи маълумоти гуногун, то 60 баробар боло рафта метавонанд: аз 0,5 дирам то 30 дирам барои 1 SMS. Ин маънои онро дорад, ки алоқаи мобилӣ барои ҳамаи корбарон қимат мешавад”, омадааст дар хабар.
Аз ҳама муҳимамш ин ки ширкати офшории IRS мутааллиқ ба наздикони раисҷумҳур бо инҳисор кардани паёмакҳои мобилӣ ба маълумоти шахсӣ, мукотибаи ҳар кадоме аз корбари интернет дастрасӣ пайдо мекунад.
Дар ҳамин ҳол муовини сардори Хадомати Алоқа Илҳом Атоев ба “Азия-Плюс”, ин хабарро рад карда, гуфтааст, ки “Ин маълумоти бардурӯғ (фейк) аст, ман дар ин бора чизе намедонам. Аз ҷониби кӣ паҳн шудани чунин маълумоти бардурӯғро фаҳмидан даркор аст”.
Аммо коршиносони мустақил гуна шудани корро аз эҳтимол дур намедонанд. Зеро ширкати “Фароз”, ки мутааллиқ ба домоди раисҷумҳур аст, тавониста, ки аксари тиҷоратҳои бузурги кишварро инҳисор кунад. Ва ширкати оффшории IRS, ки тиқби баъзе фарзияҳо низ ба яке аз домодони Эмомалӣ Раҳмон тааллуқ дорад, инҳисори тиҷоратҳои боқӣ монда кори чандон душвор нест.
