Нишастҳои навбатии Созмони Амният ва Ҳамкории Аврупо дар мавриди санҷиш ва баҳодиҳии ҳуқуқи инсон дар шаҳри Варшава, пойтахти Лаҳистон аз имрӯз, 2-уми октябри соли 2023 шуруъ мешавад.
Дар нишастҳои САҲА масъалаҳои ҳуқуқи башар, озодиҳои бунёдӣ, озодии баён ва расона, ҳуқуқ ва озодиҳои ақалиятҳо, интихоботи озод ва ғайра баҳсу баррасӣ мешавад ва ин нишастҳо то 13-уми октябр идома хоҳад кард.
Нишасти имсола таҳти раҳбарии Македонияи Шимолӣ баргузор шуда, дар он намояндагони 57 давлати узви САҲА, шарикон ва ниҳодҳои САҲА ва дигар сохторҳо, инчунин намояндагони созмонҳои байниҳукуматӣ ва ҷомеаи шаҳрвандӣ ширкат мекунанд.
Ин нишаст ҳар сол як маротиба дар шаҳри Варшава баргузор мегардад, аммо ба сабаби авҷи бемории ҳамагири COVID-19 солҳои 2020 ва 2021 баргузор нашуда буд.
Нишасти соли гузашта таҳти раёсати кишвари Лаҳистон бе ширкати намояндагони ҳукумати Русия, Белорус ва Тоҷикистон баргузор гардида буд.
Аммо ба намояндагӣ аз Тоҷикистон, ба ҷуз намояндагони ҳукумат, аз мухолифин “Гурӯҳи 24”, ПМТ ва дигар шахсони ҷомеаи шаҳрвандӣ дар ин нишаст ҳузури фаъол доштанд.
Дар нишастҳои Созмони Амният ва Ҳамкоири Аврупо дар мавриди санҷиш ва баҳодиҳии ҳуқуқи инсон солҳои 2016 то 2019 миёни мухолифони тоҷик ва намояндагони ҳукумат баҳсҳои зиёде сурат мегирифт.
Мақомоти Тоҷикистон то ҳол расман шарҳ надодаанд, ки чаро намояндагонаш дар нишасти соли гузашта иштирок надоштанд. Аммо ба гуфтаи огаҳони умур, чун мақомдорони тоҷик дар давоми солҳои 2021-2022 даст ба қатлу боздошти зодагони Бадахшон заданд ва чандин рӯзноманигорро дар ин муддат зиндонӣ карданд ва посухе дар ин масъала надоштанд, аз ин рӯ, аз иштирок худдорӣ карданд.
Инчунин маълум нест, ки намояндагони ҳукумати Тоҷикистонро дар нишасти имсола хоҳем дид ё на.
