Имрӯз масҷиди марказии шаҳри Душанбе бо номи Имоми Аъзам Абуҳанифа Нуъмон ибни Собит шоҳиди баргузории нахустин намози ҷумъа буд.
Имрӯз, 16-уми июни соли 2023 ҳазорон нафар аз намозгузорони шаҳри Душанбе, ноҳияҳои тобеи марказ ва дигар афроде, ки бархе онҳо аз шаҳру ноҳияҳои дурдаст низ ташриф оварда буданд, нахустин намози ҷумъа дар бузургтарин масҷиди Тоҷикитсонро якҷоя бо ҷамоат адо карданд.
Дар аксу наворҳое, ки бархе корбарони шабакаҳои иҷтимоӣ аз рафти баргузории ин маросими муҳимми ибодатӣ ба иштирок гузоштаанд, дида мешавад, ки ҳазорҳо нафар барои дидану намоз хондан дар дохили масҷид ҳузур доранд.
Инчунин дар навор дида мешавад, ки агар аз як сӯ хеле аз намозгузоронро истифода аз ҳунарҳо дар санъати меъмории бинокорон ба ҳайрат оварда бошад, аз сӯи дигар, садои фораму гӯшнавози азонгӯи он низ бисёриҳоро мафтун кардааст.
Гуфта мешавад, ин масҷиди ҷомеаи марказӣ 5-уми октябри соли 2009 дар рӯзҳои таҷлили 1310-солагии Имом Абуҳанифа Нуъмон ибни Собит бо ҳузури як қатор мақомоти расмӣ ва донишмандони кишварҳои исломӣ гузошта шуда буд. Бунёди ин масҷид ҳудуди 7 сол пеш ба анҷом расида буд, вале ҷониби Тоҷикистон, то сафари Амири давлати Қатар ба кишвар онро мавқуф гузошта буд.
Амири давлати Қатар, ки ин масҷид бо сармояи беш аз 70 миллион долларии кишвараш сохта шудааст, 8-уми июни соли ҷорӣ ба Тоҷикистон сафар кард ва дар ҳамон рӯз ба сурати расмӣ ин масҷид ба истифода дода шуд.
Маркази исломии Тоҷикистон эълон карда буд, ки бо сабаби таъйин нашудани сархатиби ин масҷид дар ҷумъаи аввале, ки ба рӯзи 9-уми июн рост омад, дар он ҷо намози ҷумъа хонда нашуд. Сипас, собиқ сархатиби ноҳияи Данғара Эшони Сайидмутаҳҳар Асомиддинзода ҳамчун хатиб ба ин масҷид ба кор истихдом шуд ва имрӯз нахустин ҷумъае буд, ки дар он багузор гардид.
