Ба гузориши сомонаи Вазорати тандурустӣ ва ҳифзи аҳолии Тоҷикистон, рӯзи 12 марти соли равон дар ин вазорат барномаи тандурустии Иттиҳоди Аврупо муаррифӣ гардид.
Барномаи тандурустии Иттиҳоди Аврупо дар Тоҷикистон барои солҳои 2021-2025 дар назар гирифта шудааст.
Дар ҷаласаи мазкур вазири тандурустии Тоҷикистон Ҷамолиддин Абдуллозода, Виктор Олчавски, роҳбари Намояндагии Созмони ҷаҳонии беҳдошт дар Ҷумҳурии Тоҷикистон, Осама Маккави, Намояндагони Хазинаи кӯдакони СММ (ЮНИСЕФ) дар Тоҷикистон ва Ҷамъияти Олмонии ҳамкории байналмиллалӣ (GIZ) дар Тоҷикистон иштирок намуданд.
Барномаи мазкур дар чорчӯби Стратегияи миллии рушди соҳаи тандурустӣ барои солҳои 2010-2030 роҳандозӣ шуда ва ҳадаф аз пиёдасозии ин тарҳ кумак расонидан ба фарогирии ҳамаҷонибаи беҳдоштӣ дар Тоҷикистон, тақвияти мудирияти бахши беҳдоштӣ ва механизмҳои маблағгузорӣ дар ин соҳа инчунин назорати дақиқи системаи пешгирии бемориҳои сироятӣ дар тамоми системаи расонидани кӯмаки тиббӣ ва ғайра мебошанд.
