Бахтигул Карриева, роҳбари дафтари Созмони беҳдошти ҷаҳонӣ дар Тоҷикистон дар мавриди кадом навъи чораҳои маҳдудкунанда дар мубориза бо пандемияи коронавирус кӯмак карда метавонад, ибрози андеша намудааст.
Ба навиштаи “Sputnik” хонум Карриева гуфтааст: “Таҷриба ва дониш дар бораи COVID-19 ба андешидани чораҳои оптималӣ дар мубориза бо коронавирус мусоидат мекунад”.
“Тадбирҳое, ки аллакай амалӣ мешаванд ё ҳоло пешниҳод карда мешаванд, аксуламал ба вазъи кунунӣ мебошанд ва барои пешгирии бадшавии эҳтимолӣ пешбинӣ шудаанд. Ин чораҳо барои наҷоти ҷони инсон аз COVID-19 ва дар баробари ин пешгирии хатари марбут ба бемориҳои дигар ва таназзули иқтисодӣ заруранд”, – гуфтааст хонум Карриева.
Дар идома қайд кардааст, ки маҳдудиятҳо дар кишварҳои аврупоӣ шадидтар мешаванд ва ин ба афзоиши бемории коронавирус марбут аст. Ҳукуматҳои маҳаллӣ ва ҷамоатҳо бояд барои чораҳои пешгирӣ ба пуррагӣ ширкат варзанд – муносибати тамоми ҳукумат ва тамоми ҷомеа калидӣ аст. Мо бояд як қадам пеш бошем “,- иброз доштааст Карриева.
Ба гуфтаи намояндаи СБҶ кишварҳо ҳанӯз ҳам фурсат доранд ва бояд барои пешгирии беморӣ ва наҷоти ҳарчи бештари одамон чораҳо андешанд:
“дарёфти гирифторон, таҳқиқоти кластерӣ, ҷудокунӣ ва нигоҳубини ҳама сироятшудагон, қатъи тамос, дастгирӣ ва муҳофизати кормандони соҳаи тандурустӣ ва ҳифзи осебпазиртарин қишр мебошанд”.
Ба гуфтаи Карриева дар ояндаи наздик чораҳои мубориза бо паҳншавии коронавирус бо воситаҳои нави пешгирӣ ва табобат, аз ҷумла ваксинаҳо пурра карда мешаванд.
Тибқи иттилои Вазорати тандурустӣ ва ҳифзи иҷтимоии аҳолии Ҷумҳурии Тоҷикистон дар як шабонарӯзи гузашта 43 ҳодисаи нави бемории COVID-19 сабт гардида, дар маҷмӯъ шумораи гирифторони ин беморӣ дар кигвар ба 10819 нафар баробар гардидааст.
Ҳамчунин гуфта шудааст, 62 нафар пас аз табобат ба хонҳояшон рухсат дода шуда, дар маҷмӯъ шумори шифоёфтагон аз ин беморӣ дар Тоҷикистон ба 9951 (92,0%) баробар гардида, бар асари ин беморӣ 81 нафар фавтидаанд.
