Рӯзҳои 01-02 май дар шаҳри Ботканди вилояти Ботканди Ҷумҳурии Қирғизистон ҷаласаи навбатии якҷояи Ҳайатҳои ҳукуматии Ҷумҳурии Тоҷикистон ва Ҷумҳурии Қирғизистон оид ба делимитатсия ва демаркатсияи сарҳади давлатии Тоҷикистону Қирғизистон баргузор гардид. Дар ин бора рӯзи 5-уми расонаи ҳукуматии “Ховар” хабар дод.
Бино бар изҳорот “ҷонибҳо ба мувофиқа расиданд, ки барои тасвири хати лоиҳавии Сарҳади давлатӣ байни Ҷумҳурии Тоҷикистон ва Ҷумҳурии Қирғизистон дар қисматҳои аз нуқтаи сарҳадии № 43 то нуқтаи сарҳадии № 61 ва аз нуқтаи сарҳадии №135 то нуқтаи сарҳадии №141 аз ҳуҷҷатҳо ва маводи марзбандии миллию ҳудудии солҳои 1924-1927 ва комиссияи паритетии соли 1989 истифода мекунанд.”
Аммо дар изҳорот гуфта нашудааст, ки гап дар бораи чанд километр хатти марз меравад ва кадом минтақаҳоро дар бар мегирад.
Ёдовар мешавем, ки чанд рӯз пеш раиси КДАМ-и Қирғизистон Камчибек Тошиев дар суҳбат бо сокинони деҳаи Мақсат изҳор дошта буд, ки Ҷумҳуриҳои Тоҷикистону Қирғизистон тибқи қарори комиссияи кории дуҷониба то 9 май 112 километр сарҳадро муайян мекунанд. Ӯ ҳамчунин дар идомаи суҳбаташ иброз дошт, ки ин созишнома зимни вохӯрии Эмомалӣ Раҳмон ва Ҷабборов ба имзо расида, сипас таъйин ва аломатгузории сарҳад анҷом дода мешавад.
Ҳамчунин дар изҳорити муштараки ҳайатҳои ҷонибҳр гуфта шудааст, ки дар минтақаҳои Овчи Калъачаи ноҳияи Бобоҷон Ғафуров, Чоркӯҳ, Сомониён, Хоҷаи Аълои шаҳри Исфараи вилояти Суғди Ҷумҳурии Тоҷикистон, инчунин нуқтаҳои аҳолинишини Максат, Кулундуи Лайлак, Коктерек, Оқсойи ноҳияҳои Бодканди Ҷумҳурии Қирғизистон, гурӯҳҳои кории ҷонибҳо то 17 майи соли 2021 ба иҷрои корҳои топографӣ ва тасвири хатти лоиҳавии сарҳади давлатӣ шуруъ кунанд.
Ҳамчунин дар ин ҷаласа ҷонибҳо ба мувофиқа расидаанд, ки то ба итмом расидани раванди делимитатсия, демаркатсия ва барасмиятдарории қонунии Сарҳади давлатии Тоҷикистону Қирғизистон ҷонибҳо роҳи мошингарди “Хоҷаи Аъло-Ворух”-ро дар хамгашти самти шарқии нуқтаи аҳолинишини Танги (Капчыгай)якҷоя месозанд ва ҷониби Тоҷикистон истифода ва нигоҳдорӣ мекунад. Мақоми ин роҳро созишномаи алоҳидаи давлатӣ байни ду кишвар муайян мекунад.
Дар изҳороти Ҳайатҳои ҳукуматии Тоҷикистон ва Қирғизистон ин амалро “бо мақсади ҳаракати бемамонияти шаҳрвандон, убури воситаҳои нақлиёт ва молҳои Ҷумҳурии Тоҷикистон” номидаанд.
Ҳамчунин ҷонибҳо ба мувофиқа расиданд, ки пас аз ба итмом расидани сохтмони роҳи мошингард ба тасвири лоиҳавии хати сарҳади давлатии Тоҷикистону Қирғизистон шуруъ мекунанд.
Дар охири изҳорот гуфта шудааст, ки Ҷаласаи муштараки навбатӣ дар қаламрави Ҷумҳурии Тоҷикистон баргузор карда мешавад.
