Имсол сатҳи об дар обанбори “Норак” ба андозаи лозимӣ ҷамъ шудааст. Тоҷикистон дар бораи истеҳсоли нерӯи барқ ва содироти он омори дақиқ пешниҳод намекунад.
Бино ба иттилои Вазорати энергетикаи Тоҷикистон аз аввали моҳи октябр ҷараёни об дар дарёи Вахш хуб ба назар мерасад ва ба тавлиди нерӯи барқи лозимӣ барои аҳолии кишвар кофӣ аст.
Хабаргузории “Авесто” дар истинод ба манбааш аз Вазорати энергетика хабар дод, ки сатҳи об дар обанбори Норак дар ҳадди 910,69 метр аст, ки амалан ба нишондиҳандаҳои ҳамин давраи соли 2020 мувофиқат мекунад.
Масъулони бахши энергетикаи кишвар хабар доданд, ки 3-уми октябр воридшавии об дар минтақаи обанбори Норак 566 метри мукааб дар як сонияро ташкил дод, ки он нисбат ба ҳамин давраи соли гузашта 26 метри мукааб дар як сония бештар аст.
Воридшавии об ба дарёи Вахш ва ҳаҷми захираи обанборҳо имкон медиҳад, ки истеҳсоли муътадили нерӯи барқ барои қонеъ кардани талаботи дохилӣ ва содироти он дар ҳаҷми хурд имконпазир гардад.
Тибқи маълумоти Вазорати энергетика, ҳоло дар ҷумҳурӣ ҳар рӯз зиёда аз 37,8 миллион кВт / соат нерӯи барқ тавлид мешавад, ки 35,1 миллион кВт / соати он барои истеъмоли дохилӣ истифода мешавад. Қисми боқимонда ба кишварҳои ҳамсоя содир карда мешавад.
Ин дар ҳолест, ки вазорат як моҳ қабл дар мавриди истеҳсол ва интиқоли нерӯи барқ ба хориҷ оморҳое дода буд, ки ба омори имрӯзааш мувофиқат намекунад.
Пештар гуфта буд, ки Тоҷикистон ҳамарӯза ба Афғонистон тақрибан 9 миллион кВт / соат нерӯи барқ интиқол медиҳад. “Танҳо моҳи август ба кишвари ҳамсоя 8,8 миллион кВт/соат нерӯи барқ содир шудааст”, гуфта буданд аз Вазорати энергетика ба “Авесто”.
Тибқи оморҳои қаблӣ, ҳар рӯз дар Тоҷикистон ба ҳисоби миёна беш аз 61 миллион кВт/соат нерӯи барқ тавлид мешавад. Тақрибан 45 миллион кВт / соат дар дохили кишвар истифода шуда, боқимонда нерӯи барқ ба Афғонистон ва Ӯзбекистон фурӯхта мешавад. Дар моҳҳои январ-июли соли ҷорӣ Тоҷикистон ба кишварҳои ҳамсоя ба маблағи беш аз 55 миллион доллар нерӯи барқ содир кардааст.
Баъзе таҳлилгарон мегӯянд, Тоҷикистон дар мавриди истеҳсоли нерӯи барқ дар ҷаҳон дар ҷои 8-ум ва дар минтақа мақоми аввалро ишғол мекунад. Аммо кишвари ҷангзадаи Афғонистон бо барқ таъмин асту аҳолии Тоҷикистон дар сармои зимистон аз бебарқӣ ранҷ мекашанд.
