Зубайдуллоҳи Розиқ, зиндонии сиёсӣ ва узви Раёсати олии Ҳизби наҳзати исломии Тоҷикистон як ҳафта боз дар бемористони зиндони шаҳри Ваҳдат бистарӣ аст.
Радиои Озодӣ дар истинод ба як намояндаи Сарраёсати иҷрои ҷазо навиштааст, ки ин зиндонии сиёсиро барои хуруҷи бемории дилаш дар бемористон бистарӣ карданд, на барои фишору азият.
Бино ба гуфтаи манбаъ, ҳоло ин рӯҳонии 80-сола зери назорати пизишкон буда, наздиконаш аз аҳволи ӯ хабар мегиранд.
Пайвандони Зубайдуллоҳи Розиқ бемории қалб доштани ӯро то замони боздошташ тасдиқ карда гуфтаанд, ки ин маҳбуси сиёсӣ дар соли 2015 як дафъа дилашро табобат карда буд.
Дар ҳамин ҳол Ҳисомиддини Зубайдуллоҳ, писари Зубайдуллоҳи Розиқ дар суҳбат бо Azda.tv бистарӣ шудани падарашро дар бемористон тасдиқ карда гуфт, яке аз бародаронаш, ки дар Тоҷикистон аст, доруҳои заруриро бо машварати пизишкон ба падараш мерасонад.
Инчунин Ҳисомиддин гуфт, ки мехоҳад бо назардошти солхӯрдагӣ ва бемории қалб доштани падараш ба мақомот, аз ҷумла раисҷумҳури Тоҷикистон нома навишта, озодии пеш аз муҳлати ин маҳбуси сиёсиро дархост кунад.
Гуфта мешавад, Зубайдуллоҳи Розиқ ҳамроҳи дигар маҳбусони сиёсӣ, аз ҷумла Раҳматуллоҳи Раҷаб, Ҳикматуллоҳ Сайфуллоҳзода ва Муҳаммадалии Файзмуҳаммад ҳанӯз соли 2021 дар номае аз раиси ҷумҳури Тоҷикистон хоста буданд, ки барои бозбинии парвандаашон “дар ҳузури коршиносону нозирони байналмилалӣ ва рӯзноманигорони дохиливу хориҷӣ” мусоидат кунад, вале ба ҷойи посухи мусбат ин маҳбусони сиёсиро болояшон фишор оварда, дар утоқи ҷаримавӣ ҷой карда буданд.
Дар пайи расонаӣ шудани хуруҷи бемории қалби Зубайдуллоҳи Розиқ, Кумитаи шаҳрвандии наҷоти гаравгонҳо ва зиндониёни сиёсии Тоҷикиситон бо нашри изҳороте аз мақомоти кишвар хостааст, ки ин маҳбуси сиёсиро дар зудтарин замон озод кунанд, то таҳти муроқибати вежаи пизишкон қарор бигирад.
Дар изҳороташ КШНГЗС аз он нигаронӣ кардааст, ки ба далели саҳлангории кормандони зиндон сарнавишти Муҳаммадалӣ Файзмуҳаммад бо Зубайдуллоҳи Розиқ боз такрор нашавад.
Гуфта мешавад, Мавлавӣ Муҳаммадалии Файзмуҳаммад, зиндонии сиёсӣ ва узви Раёсати олии Ҳизби наҳзати исломии Тоҷикистон дар умри 65-солагӣ, ки дар шароити хеле бад дар маҳбас нигаҳдорӣ мешуд ва аз бемориҳои қанду фишорбаландӣ ва қалб ранҷ мекашид, рӯзи 26-уми июли соли 2024 дар зиндони шаҳри Ваҳдат аз олам даргузашт.
Ёдовар мешавем, ки Зубайдуллоҳи Розиқ ҳамроҳ бо 12 узви дигари Раёсати олии ҲНИТ моҳи сентябри соли 2015 аз ҷониби мақомотт Тоҷикистон боздошт ва бо иттиҳомҳои сохта барои 25 сол равонаи зиндон гардид.
Созмонҳои байналмилалӣ, аз ҷумла СММ борҳо аз мақомоти Тоҷикистон раҳоии беқайду шарти ӯ ва ҳамраҳонашро хоста буданд, аммо мақомот ин талаби созмонҳоро ҳамеша нодида гирифтааст.
